من القاهرة الى أبو ظبي: رحلة للجنة

معالم وسياحة

20/04/2011

من القاهرة الى أبو ظبي: رحلة للجنة

بواسطة

Ranya Saadawi

مناخ إستوائي، شواطئ رملية، أكل لذيذ، صحرا مثيرة ومغامرات في الواحات،
تسوق بلا حدود وفنادق عالمية، مرحباً بك في أبوظبي. خد أول طيارة من القاهرة
وتعالى على أبوظبي، المكان اللي ممكن تخرج فيه كل طاقاتك وتستمتع لأقصى درجة.

إزاي تروح هناك ؟

ممكن «مصر للطيران» أو«خطوط الإتحاد الجوية» اللي بـ توفر رحلات مباشرة من
القاهرة بسعر 2000 جنيه للتذكرة، «العربية للخطوط الجوية – Air Arabia» بـ تعمل رحلات من مطار برج العرب في الأسكندرية بـ
850 جنيه بس، في مواقع على الإنترنت ممتازة ممكن تساعدك على الحجز للطيران والفنادق زي www.expedia.com وwww.kayak.com وwww.cheaptickets.com.

الحاجات اللي ممكن تعملها

أبوظبي مشهورة بشواطئها الطويلة الخلابة اللي بـ تمتد لأميال ورمالها لونها
أبيض وبـ تتميز بالهدوء الشديد والمية الزرقاء جداً. ممكن تقضي يوم على الكورنيش وتمارس
الأنشطة الترفيهية المختلفة. الشاطئ العام مفتوح لأي حد ونضيف جداً. ممكن كمان
تدفع رسوم بسيطة عشان دخول الشاطئ العائلي وهناك تقدر تأجر كراسي شيزلونج وتمارس
ألعاب ورياضات مائية زي تجديف «الكاياك» وركوب البدالات والتزلج المائي بالباراشوت
أو الـ«Parasailing» وركوب الأمواج
والتزحلق على الماء.

لو كنت مغامر حقيقي روح «جزيرة ياس» وإتفرج على «عالم فيراري» اللي لسه
فاتح قريب، وده أكبر منتزه وملاهي مغلقة في العالم وفيها أسرع ساقية دوارة (قطار
سريع) في العالم بسرعة 240 كم/س. في نفس الجزيرة في تراك خاص بسباقات «فورميولا 1»
اسمه «Yas Marina Circuit» بـ يستضيف سباقات
الفورميولا كل سنة، ومفتوح طول السنة لإستضافة أحداث وسباقات تانية.

وماتنساش زيارة «مسجد الشيخ زايد الكبير»، مبنى عظيم واسع باللون الأبيض،
هـ تحس بالرهبة وانت جواه، وبالمناسبة هو تالت أكبر مسجد في العالم.

في دولة زي الإمارات بس ممكن تكون الفنادق معالم سياحية، وهـ تفهم السبب
لما تدخل فندق «فندق قصر الإمارات»، كل حاجة جواه لامعة وبراقة، خاصةً الـ1002 نجفة
واللي الكريستال المتعلق منهم سواروفسكي «Swarovski Crystal» المصنوع مخصوص للمكان. و ماتنساش تدوَّر على ماكينة البيع الإلكترونية اللي عادة بـ تبيع
وجبات خفيفة ومعلبة وكانز٬ لكن في الفندق ده بـ تبيع سبايك دهب بس!

لو عندك وقت ممكن كمان تروح نزهة صحراوية أو تروح إمارة «العين» أو «دبي».

التسوق

مدمنين التسوق هـ يبقوا في خطر، أبوظبي أسواقها مغرية جداً. «أبوظبي مول» و«الخالدية
مول» و«مارينا مول» مجموعة من المراكز التجارية اللي هناك، واللي هـ تلاقي فيها كل
حاجة من الإبرة للصاروخ.

في سوق متخصص في الدهب أسمه «سوق مدينة زايد للذهب»، فيه فِصال ومساومات
ودي حاجة مش صعبة على أهل كايرو عموماً، بس لو فعلاً عرفت توصل للسعر المناسب بعد
رحلة معاناة مع البياع بس في الآخر ما اشترتش بـ يكون موقف بايخ. وممكن تروح «سوق
قرية البري» الحديث اللي فيه منتجات الشرق الأوسط التقليدية، إركب التاكسي المائي
المجاني وإستمتع برحلة في القنوات المائية الصناعية جوة المدينة.

الأكل

محبي الأكل هـ يقضوا وقت رائع مع أكل المطبخ العالمي اللي بـ تقدمه المطاعم
في أبوظبي. فنادق المدينة الـ5 نجوم فيها مجموعة مطاعم على أعلى مستوى منها مطعم «هوي
أنز – Hoi An’s» الڤيتنامي ومطعم «مراكش
– Marakesh» للأكل المغربي أو مطعم «الفنار»
المتحرك. مطاعم تانية هندية وعربية
ولبنانية وأسعارها معقولة وجودة الأكل عالية جداً. جرب محل «القصر الهندي» أو فرع «أبو
شقرة» المصري للمشويات.

أبوظبي بالليل

في أماكن للسهر كتير في أبوظبي ومعظمها موجود في الفنادق الكبيرة، في «هيمنجوايز
– Hemingway’s» لو عايز مكان للرقص على مزيكا بـ
تتلعب لايف أو ممكن تجرب مكان اسمه «ساكس – Sax» . جرب « PJ’S » الأيرلندي اللي معظم زواره أجانب، ولو عايز مكان
راقي قوي ممكن تروح «Hakkasan» اللي في فندق قصر
الإمارات.

http://www.timeoutabudhabi.com

الإنتقال والمواصلات

التاكسيات أسهل حاجة، وتأجير العربيات كمان متاح لو معاك
كارت إئتمان ورخصة قيادة دولية.

تروح إمتى؟

روح في أي وقت في السنة لكن حاول تتفادى الصيف عشان الحر بـ يكون
غير عادي والرطوبة خانقة.

لو بـ تفكر في ويك إند
ما يتنسيش مش هـ يكون في أحسن من أبوظبي.