مسجد “سليمان باشا”.. اسجد واقترب
القلعة عنوان مسجد سارية الجبل مساجد في القاهرة مساجد مصرية تاريخية مسجد سليمان باشا
Cairo 360
عمر مراد
وما الدار إلا مكان للاحتماء والراحة والسكينة، ولما بتغيب عن دارك وترجع بعد فترة، بتحس بفرحة الحنين. وبعد فترة أغلقت فيها أبواب مسجد سليمان باشا الموجود داخل قلعة صلاد الدين، يبدو أنه “حان وقت العودة”! المسجد التاريخي بيستعد لفتح أبوابه من جديد، بعد عملية تطوير بدأت في 2017 شملت كل تفاصيل المسجد.
مسجد “سليمان باشا” اللي بيعرف باسم تاني وهو “سارية الجبل” هو تحفة معمارية حقيقية ممزوجة بعبق الماضي مع الجمال العصري.
طب إيه حكاية المسجد؟!
المسجد اتبنى على انقاض مسجد قديم بناه أبو منصور قسطه غلام المظفر في العصر الفاطمي. لكن حتى المسجد الجديد أصابه خراب كبير مع مرور الزمن لغاية ما أمر سليمان باشا في عهد السلطان سليمان القانوني بتجديده وإعادته مرة أخرى للحياة، ولُقب المسجد باسمه.
بميز المسجد أنه كان أول مسجد في مصر ينشأ على الطراز العثماني، ومئذنته أصبحت أول مثال للمئذنة العثمانية في مصر.
المسجد بيمزج بين ثقافتين، النكهة المصرية والنكهة العثمانية، وبيقع بجوار سور قلعة صلاح الدين، في الجانب العسكري، بيتكون من 4 واجهات حجرية، واتخطط على قسمين، والنقوشات والرسومات العثمانية بتيمز كل جزء فيه.
المسجد هيفتح أبوابه من جديد لعشاق السكينة والسلام قريبًا. زوروا المسجد واستمتعوا بجماله الفريد، وبعدها ممكن تاخدوا جولة في القلعة وأكيد ده هيكون يوم مميز.
