The Definitive Guide to Living in the Capital , Cairo , Egypt

العيد خلص وماقدرتش تخرج أو تفصل من الشغل؟ مافيش مشكلة إنك ما سافرتش في الإجازة، لأن لسه عندك فرصة تعيش أجواء المصيف والفسح برحلة يوم واحد!

لو أنت من الناس اللي بتحب خروجة اليوم الواحد، أو معاك أصحاب أو أسرة ومش عاوز تعقد الدنيا، جمع حبايبك وتعال شوف ترشيحاتنا لـ5 أماكن قريبة من القاهرة، تقدر تروح وتيجي في نفس اليوم، وتغير جو وتتبسط.

الإسكندرية

دايمًا بتكون الاختيار الأول لكتير من سكان القاهرة. تقدروا تزوروا قلعة قايتباي، متحف المجوهرات، والمتحف اليوناني الروماني. وكالعادة، القعدة على البحر ليها طعم تاني، والمشي في شارع خالد بن الوليد أو ستانلي هيخليكم تحسوا إنكم في فيلم. ماتنسوش تاكلوا من مطاعم السمك المشهورة هناك وتتصوروا كتير!

بورسعيد

من أرخص وأجمل المدن الساحلية، فيها بحر وشوارع حلوة وطابع مميز. اركبوا المعدية لبور فؤاد، وارموا أكل للطيور على البحر، وخدوا لفة في محلات الشوكولاتة والحلويات، وطبعًا ما تنسوش تاكلوا أكلة سمك محترمة على البحر!

الفيوم

الفيوم فيها كل أنواع المغامرة والراحة. من بحيرة قارون، للشلالات، للتزحلق على الرمال، لركوب الخيل والبيتش باجي. وكمان الأكل الفلاحي هناك مالوش حل! ممكن تقضوا يوم مختلف ما بين الطبيعة والمغامرة.

الإسماعيلية

لو بتحبوا الهدوء والبحر، يبقى الإسماعيلية اختيار هايل. استمتعوا بأكلة سمك على البحر، زوروا متحف الإسماعيلية القومي، واقعدوا على الكورنيش تتابعوا المراكب وهي داخلة القناة. فسحة هادية ومميزة مش هتتكرر.

العين السخنة

رغم إن تكلفتها أعلى شوية، بس هي دايمًا تستاهل. بين الشواطئ، والأكوا بارك، والمراكب اللي بتاخدكم في جولة وسط الشعب المرجانية، والغطس والسنوركلينج… هتحسوا إنكم في أجازة بجد حتى لو يوم واحد بس.