The Definitive Guide to Living in the Capital , Cairo , Egypt

القاهرة مليانة أماكن تاريخية مهمة، لو مشيت فيها في يوم هتحس إنك رجعت بالزمن لماضي مصر بكل جماله وشياكته. لكن من ضمن المناطق الكتير دي فيه 11 منطقة هم الأجمد، وتقدر تعتبرهم متاحف مفتوحة لفترات مهمة من تاريخ القاهرة.

بنفكركم تاني إننا بنحتفل بمرور 11 سنة على انطلاق موقعنا كايرو 360، وعلشان كدة هتشوفوا على الموقع قوائم كتير بتبدأ بأجمد 11.. يلا نبدأ القائمة الجديدة:

حارة الضرب الأصفر

واحدة من أجمل حواري القاهرة التاريخية، موجودة في قلب القاهرة الفاطمية زي ما تكون متحف طبيعي مفتوح للزائرين طول الليل والنهار، والحارة بتمتد بداية من منطقة الموسكي وانتهاء بحي الجمالية الشهير متقاطعة مع شارع المعز لدين الله الفاطمي أحد أشهر شوارع القاهرة التاريخية.

بتضم الحارة مجموعة ضخمة من التراث الإنساني العظيم، وفيها العشرات من البيوت الأثرية التاريخية الشهيرة، منها بيت السحيمي.

المغربلين

منطقة تاريخية عظيمة، موجودة بجانب مناطق السروجية، والخيامية، والقربية، والساقيين، وكان بيسكنها العطارين اللي كانوا دايمًا بيغربلوا عطارتهم من الشوائب فيها، علشان كدة بقى اسمها المغربلين، أما السروجية فكانت مشهورة بصناعة كل ما يخص الخيول من الحدوات وسروج، والخيامية كان بيسكنها صناع الخيام، أما القربية فكان سكانها مشهورين بصناعة القرب وبيعها للساقيين.

منطقة باب زويلة

منطقة باب زويلة في قلب القاهرة القديمة بتضم العديد من المباني التاريخية المهمة، زي: “مسجد الصالح طلائع، وسبيل محمد علي، وتكية الكلشني، وبيت الشيخ القاياتي، ومسجد إينال اليوسفي، ومسجد الكردي، وبيت الشبشيري، ومدرسة القربية، وزاوية فرج بن برقوق، وربع الدهيشة”.

 منطقة الحاكم

من أجمل مناطق القاهرة التاريخية، وبتضم منطقة الحاكم مجموعة من المباني التاريخية، ومنها: “وكالة كحلا، ووكالة قايتباي، وباب وكالة قيسون، وباب النصر، وباب الفتوح”.

الحسين

عن منطقة الحسين التاريخ يقدر يقول ما شاء! مكان تاريخي عظيم، وقريبًا الحكومة المصرية هتعمل مشاريع مهمة في المنقطة ومنها مشروع خان الحسين للحرف اليدوية، وفندق 4 نجوم، ومنطقة بازارات، ومطاعم، ومنطقة مدرسة حرفية للتعليم والتدريب على الحرف اليدوية، بالإضافة لفندق المسافر خانة. يعني المنطقة بجد هتكون متحف تاريخي مفتوح.

خان الخليلي

اسم الشارع ده نسبة لمؤسسه الأمير “جركس الخليلي”، وهو واحد من أمراء السلطان برقوق، وبيضم خان الخليلي مساجد ومعالم أثرية وأسواق ، لكن اللي ممكن تكون ماتعرفوش هو إن الشارع بيقع فوق مقابر الخلفاء الفاطميين سابقًا.

منطقة درب اللبانة

بتعتبر حارة “درب اللبانة” بحي القلعة، من أشهر حارات القاهرة الفاطمية، وبتتمتع بطابع خاص وموقع فريد، وده لأنها بتقع فوق سفح عالي وبتحيطها كثير من درجات السلالم من الناحيتين علشان تقدر توصل لها، وبتحيط بيها المساجد الأثرية الرائعة وبتجاورها قلعة صلاح الدين.

منطقة الحطابة

منطقة الحطابة بتشمل عدد من مباني العصرين المملوكي والعثماني، بالإضافة لمباني تاريخية ودينية مميزة، وحوالي 67 ورشة حرفية أغلبها يدوية.

منطقة سوق السلاح

“سوق السلاح” واحد من أقدم الشوارع التاريخية في القاهرة، موجود في منطقة الدرب الأحمر، وبيحتوى على عدد من الأماكن والمساجد الأثرية، بتمثل تاريخ مصر ودولها الحاكمة على مر العصور. هتلاقوا في الشارع كتير من المعالم الأثرية، منها “بوابة منجك السلحدار”، ومسجد ومدرسة ألجاي اليوسفي، و”مسجد سعود الرفاعى”.

أبواب القاهرة

نقدر نعتبر الأسوار والأبواب هي عنوان العصر الفاطمي في مصر، من تصميم معماري وفنون إسلامية، وكان عندنا في مصر 8 أبواب هم: “باب الفتوح” و”باب النصر”، و”باب زويلة” و”باب الفرج”، و”باب المحروق” و”باب البرقية”، و”باب سعادة”، و”باب القنطرة”، لكن للأسف مش باقي من الأواب دول غير 3 بس وهم: “باب الفتوح”، و”باب زويلة”، و”باب النصر”.

باب اللوق

كانت معروفة زمان بخط الإسماعيلية نسبة لللخديوي إسماعيل، وفي بداية العصر المملوكي كانت أرض زراعية وفضلت أرض زراعية لحد سنة 1261 لما بنى فيها الظاهر بيبرس بيوت للمغول الوافدين، وبعدين اتحولت لأرض زراعيه تاني لحد سنة 1858 لما بنى فيها الخديوي إسماعيل مباني وبيوت وقصور وظهرت فيها الشوارع والميادين. المنطقة كأنها متحف مفتوح من الزمن ده.