The Definitive Guide to Living in the Capital , Cairo , Egypt

الإسكندرية من أجمل المدن اللي ممكن نقضي فيها داي يوز غير مكلف، لأنها مش زحمة زي القاهرة وطبيعتها أجمل، وبحرها يرد الروح وبيخلينا نحس بأننا لسه قادرين نعافر في الحياة.

إحنا قررنا في كايرو 360 نقدم لكم دليل عملي لقضاء 24 ساعة في الإسكندرية، وفي السطور الجاية هنقول لكم على تفاصيل تجربتنا الشخصية هناك.. في الإسكندرية.

تقدروا تسافروا من القاهرة للإسكندرية، عن طريق ميكروباصات رمسيس أو الهرم والتذكرة 70 جنيه، أو عن طريق جو باص والتذكرة بتبدأ من 100 جنيه، وكمان فيه سويفيل وأوبر شاتيل تقدروا تسافروا من خلالهم والتذكرة بتبدأ من 110 جنيه، وبننصحكم بلاش تسافروا بالعربية علشان تقدروا تستمتعوا أكتر.

إحنا ركبنا ميني جو باص من عبد المنعم رياض، ونزلنا الموقف الخاص بيهم في سيدي جابر، وحجزنا من الأبليكيشن بتاعهم، ووصلنا في 3 ساعات منهم ربع ساعة ريست، وبعدها عدينا النفق بتاع محطة سيدي جابر واتمشينا لحد كوبري سيدي جابر وربكنا ميكروباص علشان ننزل محطة الرمل، اللي هي وسط البلد بتاعة إسكندرية.

بدأنا يومنا بالتوجه لفندق “رويال جويل”، واللي فيه مطعم اسمه “ليل”، وده بيقدم صينية إفطار في عرض خاص هتلاقوا فيها “فول – فلافل – أومليت – بطاطس – جبنة – سلطة – عيش”، وكمان معاهم شاي أو قهوة فري، وده بسعر 51 جنيه، وطعمهم كان حلو بصراحة، وكمان عندهم صينية فطير مشلتت وعسل ومربى بنفس السعر، ولو أنتم فردين تقدروا تطلبوا الطلبين تحدقوا بالفول والفلافل وتحلوا بالعسل والطحينة.

ممكن كمان تفطروا في “نعنع” جوا كازينو الشاطبي، وده على البحر على طول، والفطار عندهم سعره 150 جنيه، وهو بيتكون من “فول – طعمية – أومليت – بطاطس – جبنه – عيش عادي وتارت – عسل – مربى”، وعندهم حتلقواعلى الباب عصافير وبغبغان هتبسطوا بيهم وهتتصوروا معاهم كمان، ده غير التصوير والفيو بتاعكم كله البحر.

بعد ما تخلصوا الإفطار وتنبسطوا بالفيو اللي بيكون شايف البحر، تنزلوا تتمشوا على البحر شوية، وتقدروا تزوروا مكتبة الإسكندرية اللي قريبة جدًا من المكان، أو تروحوا قلعة قايتباي اللي هي في اتجاه بحري وبردوا قريبة وسهل تتمشوا فيها، وفيه كمان متحف المجوهرات اللي فيه المجوهرات بتاعته من ورث العائلة الملكية، ودي من أهم الأماكن اللي مهم أنكم تزوروها، وكمان تقدروا تخرجوا في فسحة مميزة بس وأنتم راجعين لمحطة الرمل وتركبوا الأتوبيس المكشوف علشان تستمتعوا بفيو للبحر من فوق، وتتصوروا صور لطيفة وحلوة.

نوصل بقى للغداء اللي تقدروا تختاروا بين أماكن كتير زي “هوت” اللي بيقدم أكل مصري وشامي، أو “مُسلم” اللي بيقدم سندوتشات بشكل مختلف، وأوعوا تجيبوا حجم كبير جدًا علشان الكبير عندهم عاوز أكيل، أو “WAVE” اللي جربنا من عندهم البيتزا السلامي والتشيكن وكانت عظيمة، وكمان تقدروا تقعدوا عندهم تشربوا حاجة، ولازم تجربوا البان كيك بتاعهم علشان مش هتلاقوه في مكان تاني.

ولما تخلصوا غداءننصحكم تشربوا قهوة من البن البرازيلي اللي بيقدم أحلى قهوة ولاتيه وموكا ونسكافيه، وكمان عندهم تارت معمول بحب وعظمة ودسم جدًا.

طبعًا القهاوي البلدي في إسكندرية وخاصة اللي على البحر ليها رونق خاص، وإحنا في النهاية قعدنا شوية في قهوة البدري علشان نشرب سحلب وعصير موز، واستمتعنا بيومنا وركبنا ورجعنا تاني على القاهرة بس المرة دي رحنا محرم بك ركبنا من الموقف الجديد بتاع إسكندرية وكانت الأجرة 70 جنيه.

فيه أنشطة كتير جدًا تقدروا تعملوها في الإسكندرية لو عرفتوا تعملوا بلان وتنظموا وقتكم، وأهم ما في تنظيم الوقت أنكم تعملوا حسابكم أن الجمعة والسبت الكورنيش بيكون زحمة في العربيات فبلاش تخططوا لحاجات بعيدة قوي عن بعض، وطبعًا الأفضل تركبوا مواصلات عامة “مشروع” لو كل مشاويركم وفسحتكم على البحر، ونتمنى لكم داي يوز سعيد.