كوبري “إيفل” المعلق.. تحفة فنية في حديقة حيوان الجيزة
الخديوي اسماعيل جوستاف إيفل حديقة الحيوان كباري القاهرة كباري مصرية كوبري إيفل المعلق
Mohamed Talaat
كلنا عارفين حديقة الحيوان وتاريخها وجمالها، وهي بلا منافس الأكثر زيارة في كل مزارات مصر، بسبب إنها بتحتوي على أنواع كتيرة من الحيوانات والطيور، ده غير مساحات الخضرة الواسعة والجميلة المريحة نفسيًا، بالإضافة لسعر التذكرة المناسب للجميع، لكن هل تعرفوا إن الحديقة اللي مساحتها 80 فدان، فيها تحفة فنية وتاريخية مميزة جدًا اسمها كوبري “إيفل” المعلق؟
تعالوا نتعرف أكتر على الكوبري ده، واللي بتقوم الحكومة المصرية حاليًا بترميمه بالتعاون مع الحكومة الفرنسية، وهيتم الإعلان عن افتتاحه للجمهور قريبًا.
“إيفل” هو كوبري معلق في حديقة حيوان الجيزة، اتبنى في الفترة من 1875 ولحد 1879، بأوامر من الخديوي إسماعيل، وده قبل بناء حديقة الحيوان اللي اتبنت سنة 1891، وكمان قبل ما يتبني برج “إيفل” الأشهر في فرنسا.
ومصمم كوبري “إيفل” هو نفسه مصمم برج “إيفل” في باريس، وهو المهندس “جوستاف إيفل”.
الكوبري بيكشف حديقة الحيوان بالكامل في منظر خلاب بانورامي، وهو في الأساس كان جزء من حديقة إسماعيل باشا، وهو الآن مسجل كأثر نادر، وفوق الكوبري المعلق هتلاقوا شعار الخديوي إسماعيل، والمكون من حرفين “IP”، وكمان 3 نجوم وفوقهم تاج ملكي.
وفي الأيام الأخيرة، مصر وفرنسا اتفقوا على إعادة ترميم الكوبري من جديد، علشان يحافظوا على وجوده، وكمان علشان يتم فتحه من جديد لزوار الحديقة، ويكون متاح استخدامه والتصوير عليه بصفته علامة فارقة في تاريخ الحديقة، وبالاتفاق ده، وبعد انتهاء الترميم، هيرجع كوبري “إيفل” علشان يكون شاهد على جزء جديد من تاريخ القاهرة.
