كنوز فرعونية في الطريق للمتحف القومي للحضارة المصرية في الفسطاط
التاريخ المصري الحضارة المصرية الفسطاط المتحف القومي للحضارة المصرية متاحف القاهرة
Cairo 360
تصوير: بيشوي فايز
متحف مميز موجود ضمن قائمة المتاحف المصرية، لكن للأسف مش واخد حقه.. بنتكلم عن المتحف القومى للحضارة المصرية بالفسطاط اللي بيتم تطويره حاليًا، واللي هيستقبل خلال الأسابيع الجاية مومياوات وتوابيت ملكية من المتحف المصرى بالتحرير.
المتحف بيحتوي على قاعة عرض مركزى معروض فيها قطع أثرية من جميع العصور المصرية المختلفة بداية من عصور ما قبل التاريخ وحتى العصر الحديث، ده غير قاعة المومياوات الملكية واللي هتضم 22 مومياء ملكية و17 تابوت ملكي هيتم نقلها الفترة الجاية فى موكب مميز هتنقله وسائل الإعلام المصرية والعالمية من المتحف المصرى بالتحرير.
وحاليًا تم البدء في وضع فتارين العرض بالقاعات، بالإضافة إلى عرض أول قطعة أثرية بقاعة العرض المركزى؛ وهى عبارة عن تمثال من الجرانيت الأسود للملك أمنمحات الثالث على هيئة أبوالهول، كمان تم تجهيز قطعتين أثريتين علشان يتم عرضهم في قاعة العرض المؤقت بالمتحف.
بيضم المتحف مجموعة متنوعة من المقتنيات الأثرية اللي بتحكى عن تطور الحضارات في مصر عبر العصور من العصر اليونانى الرومانى مرورًا بالحضارة المصرية القديمة والعصر الحديث والحضارة الإسلامية، وكمان بيحتوي المتحف على أقدم قطعة أثرية بترجع لأكثر من ٥٥ ألف سنة وهى أقدم هيكل عظمى لشاب مصرى تم اكتشافه فى قنا.
المتحف القومى للحضارة المصرية موجود في منطقة الفسطاط، وبتتضمن المرحلة الأولى منه، التى تم اﻻنتهاء منها بالكامل، مبنى اﻻستقبال، ومخازن الآثار، والمنطقة الإدارية، بالإضافة إلى معامل الترميم، ومنطقة الجراجات؛ وحاليًا الحكومة المصرية شغالة في تطوير المرحلة الثانية، وبعدها هيتم العمل على المرحلة الثالثة.
علشان تعرفوا تفاصيل أكتر عن المتحف اضغطوا هنا.
مقترح
تليفزيون
مسلسلات هتبدأ في النصف الثاني من رمضان 2025.. اعرف التفاصيل وقنوات العرض
أحمد مكي النصف الثاني من رمضان +10
الحياة في كايرو
