في ذكرى افتتاحهم.. اتعرفوا على أبرز مقتنيات متاحف مطار القاهرة
متاحف القاهرة متاحف مطار القاهرة الدولي متحف صالة 2 متحف صالة 3 مقتنيات متاحف مطار القاهرة
Mohamed Talaat
بمناسبة ذكرى افتتاحهم، هيستقبل المتحفين الموجودين في مطار القاهرة الدولي، وبالتحديد في صالة 2 و3، المسافرين الترانزيت مجانًا يوم الأربعاء 18 مايو 2022.
تعالوا نتعرف على تفاصيل الاحتفالية، وعلى أبرز مقتنيات المتحفين المهمين دول.
تفاصيل الاحتفالية
بحسب مؤمن عثمان رئيس قطاع المتاحف، ذكري افتتاح المتحفين جاية بالتزامن مع الاحتفال بيوم المتاحف العالمي، واللي بيحتفل بيه العالم السنة دي تحت شعار “قوة المتاحف”، والأمر ده بيعتبر فرصة كبيرة لتشجيع زيارة المتحفين في اليوم ده، وبيساهم في التوعية بالدور التثقيفي والمجتمعي والتعليمي للمتاحف.
ومن المقرر إقامة جولات إرشادية مجانية وورش عمل لزوار المتحفين في اليوم ده، وده هيساهم في استثمار مدة انتظارهم في المطار لحد ما تنتهي إجراءات السفر في التعرف على الحضارة المصرية العريقة.
هيتم عمل ورشة عمل في متحف صالة 2 بعنوان “تراث بلدنا” للتعريف بأهمية التراث المصري عن طريق استخدام الصلصال والألوان لتشكيل الفخار اللي بيعبر عن البيئة المصرية القديمة واستخدام المصري القديم للأواني دي سواء لحفظ العطور أو الطعام.
أما في متحف صالة 3 فهيتم عمل ورشة عمل عن تلوين بعض المستنسخات اللي قام أخصائي الترميم بالمتحف بتصنيعها وهيتم إعطائها للمسافر كهدية تذكارية من المتحف، زي مستنسخ فرس النهر وتمثال الكاتب. كمان هيتم تنظيف ورشة عمل للأطفال عبارة عن رسم على ألواح خاصة من البلاستيك لأبرز قطع المتحف بمساعدة أمناء المتحف، وكمان هيتم عرض الفيلم الوثائقي الخاص بالمتحف على شاشات عرض المطار بمبنى الركاب 3.
أبرز مقتنيات متحف صالة 2
متحف صالة 2 بيضم حوالي 304 قطعة أثرية فريدة بتوضح المميزات الفنية والتاريخية لكل حقبة من حقب مصر التاريخية بداية من العصور المصرية القديمة مرورًا بالعصر اليوناني الروماني والقبطي والإسلامي وعصر الأسرة العلوية، بالإضافة إلى فاترينة الأديان واللي بتعبر عن مدى التسامح الديني اللي شهدته مصر مهبط الأديان السماوية.
على سبيل المثال موجود في المتحف المصحف الشريف من عصر الخديوي توفيق ومخطوطة صفر إيستر وكتاب تسابيح “إبصلمودية” خاص بشهر كيهك واللي بيحتوي على منظر مصور لأدم وحواء.
أبرز مقتنيات متحف صالة 3
أما متحف صالة 3 فبيضم حوالي 60 قطعة أثرية من مختلف حقب التاريخ المصري القديم، بداية من عصر الدولة القديمة وحتى العصر الإسلامي، منها تمثال الكاتب المصري اللي بيعود لعصر الدولة القديمة، ونموذج خشبي للحياة اليومية في مصر القديمة وتماثيل لمعبودات من العصر اليوناني الروماني، وأيقونة قبطية بتمثل السيدة العذراء مريم وهي بتحمل السيد المسيح وهو طفل، ومشكاة من العصر المملوكي، ودينار من الذهب عليه اسم السلطان المملوكي الظاهر بيبرس.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
