The Definitive Guide to Living in the Capital , Cairo , Egypt

يمنى أحمد

بتحب التراث؟ كلنا بنحب التراث خاصةً لما يكون ممزوج بروايح الزمن الجميل. إيه رأيك وسط فترات الضغط اللي إنت فيها تاخد جولة في متحف من متاحف القاهرة العتيقة؟ فيه متاحف كتيرة حلوة.. هتدخلك في جو عصور مصر المختلفة والفترات اللي مرت بيها، ومتاحف تانية هتستفاد منها، ومافيش متحف مش هتطلع منه بمعلومة مفيدة.

في كايرو 360، قررنا نحط هنا 13 متحف لازم تزورهم في 2023. تابعو معانا السطور الجاية علشان تعرفوا إيه هم.

المتحف المصري الكبير: وهو أعجوبة مدينة الجيزة، بيضم كتير من القطع الأثرية النادرة جدًا، وبيقع بجانب أهرامات الجيزة الثلاثة. ممكن تروح له عند طريق مترو الجيزة وبعدين تركب مواصلة الهرم. الافتتاح الرسمي هيكون قريب جدًا، لكن حاليًا تقدر برضه تروح جولة تجريبية.

المتحف المصري بالتحرير: وده موجود بجانب ميدان عبد المنعم رياض في التحرير، أكتر حاجة بتميزه إنه فيه قطع أثرية بتعبر عن  تاريخ المصريين وحياة مصر في مختلف العصور التاريخية، بيضم حوالي 180 ألف قطعة أثرية. ممكن توصل له عن طريق مترو السادات أو تركب مواصلة من أي مكان في القاهرة لميدان عيد المنعم رياض.

المتحف القومي للحضارة المصرية: وده موجود في الفسطاط، وبيتميز بحاجات كتير زي إنه تم نقل المومياوات الملكية ليه في موكب حاشد في احتفالية العالم كله شافها. موجود فيه قاعات عرض للحرف اليدوية زي النسيج والفخار والأخشاب وغيرها، بيفتح كل أيام الأسبوع من الساعة 9 الصبح لغايه 5 المغرب.

متحف الفن الإسلامي: وده أكبر متحف بيعرض الترات الإسلامي، كل الأشعال اليدوية، وفيه معروضات كتير من فنون العمارة الإسلامية وغيرها. بيفتح كل يوم من الساعة 9 لـ الساعة 5.

متحف الشمع: ويقع بحلوان، وده فيه عدد كبير من التماثيل الشمع المصنوعة بدقة كبيرة، غير إنه فيه قصص وروايات بالشمع لسرد الحضارة المصرية القديمة. مواعيده بتكون كل أيام الأسبوع من الساعة 8 الصبح وحتى 3 العصر.

المتحف الچيولوجي المصري: وده تحفة فنية موجودة على أرض القاهرة، موجود على كورنيش المعادي من الناحية الشمالية قبل مصر القديمة كده، وبيعرض فيه حفريات ومعادن وصخور كتير مميزة.

متحف الطفل: والمتحف ده في مصر الجديدة، متخصص للطفل ومهيئ بكل إمكانياته لخدمة الأطفال، إلا إنه وللأسف مش واخد حظه من الانتشار، المتحف ده بيضم وسائل تعليمية وترفيهية كتير في مجالات متنوعة زي العلوم والتكنولوجيا والفلك وكله. غير إنه أسلوب العرض في القبة السماوية هناك علمي وبسيط يقدر الطفل يستوعب من خلاله.

متاحف قصر عابدين: القصر اللي يعتبر تحفة فنية لوحده، بيجمع جواه مجموعة من المتاحف اللي فيها معروضات نادرة، وبتعبر فعلًا عن المرحلة الملكية في مثر، زي متحف السلام ومتحف الأسلحة ومتحف الفضيات وغيرهم.

المتحف الحربي المصري: وده متحف موجود في قلعة صلاح الدين، معروض فيه الدبابات اللي شاركت في حرب أكتوبر والصواريخ ومعظم الآلات الحربية اللي الجيش بيستخدمها، فيه متعة خاصة وانت بتشوف الحاجات دي.

متحف إيمحتب بسقارة: المتحف ده مش مجرد تحفة معمارية بس، هو أكبر من كده، فيه أكتر من 250 تحفة أثرية، واتبنى مخصوص علشان يخلد ذكرى إيمحتب، اللي كان أول مهندس عرفته البشرية تقريبًا، وهو صاحب فكرة المقابر الهرمية.

متحف نجيب محفوظ بالجمالية: والمتحف بيضم جميع مقتنيات نجيب محفوظ، واتعمل في مكان قريب من بيته في الجمالية في تكبة محمد بك أبو الدهب أمام الجامع الأزهر. فيه شغل مبذول فيع علشان بعرفك بحياة صاحب نوبل وشخصياته، بيدخلك في موود تاني مختلف.

متحف النسيج المصري: موجود في شارع المعز وتحديدًا في حي بين القصرين، موجود فيع عدد كبير من قطع النسيج النادرة والسجاد، كمان فيه أجزاء من كسوة الكعبة اللي كانت مصر مشتهرة بتصنيعها.

متحف محمود خليل: وده موجود بجانب مجلس الدولة بالدقي، فيه لوحات عالمية ولوحات فن تشكيلي وخزف وتصوير وغيرها.