The Definitive Guide to Living in the Capital , Cairo , Egypt

كلنا عارفين ان الأهرامات الـ3 في الجيزة، “خوفو – خفرع – منقرع”، لكن الحقيقة ان مش دول بس هما الأهرامات الوحيدة اللي موجودة في القاهرة الكبرى، وفيه ما يقارب من 100 هرم مختلف، وعلشان كده النهاردة هنقول لكم على 5 أهرامات موجودة في بلدنا ومانعرفش عنهم معلومات كتير.

هرم زوسر

اللي هو بيقولوا عليه هرم سقارة، وده موجود في منطقة سقارة، وبناه أمنحوتب وزير الفرعون زوسر علشان يتدفن فيه خلال القرن 27 قبل الميلاد.

هرم أوناس

وده بناه أوناس آخر ملوك الأسرة الخامسة، وموجود بالقرب من هرم سقارة، وكانت نصوص هرم أوناس هي أول نصوص اكتشفت في منطقة الأهرامات كلها، وكانت بتغطي غرفة الدفن، اللي عثر داخلها على بقايا مومياء “جمجمة – ذراع أيمن – ساق” ولكن لم يتم التعرف على صاحبها حتى الآن.

هرم جد ــ كارع ــ أسيسي

كان الملك “جد ــ كارع ــ أسيسي” من ملوك الأسرة الخامسة، واسمه معناه “روح رع مثبتة” وحكم مصر في الفترة من 2414 حتى  2375 قبل الميلاد، وهو كان مخالف لملوك الأسرة الخامسة لأنه رفض بناء معبد للشمس كما هو متبع ولكن بنى هرم.

الهرم الأحمر

هو أعلى أهرامات دهشور، وبتعود قصة تسميته بالأحمر لأن فيه طبقة صدأ حمراء بتغطي الحجارة بتاعته، وكمان أهالي منطقة دهشور بيسموه “الهرم الوطواط”، ويحتل المركز الثالث كأكبر هرم مصرى بعد “خوفو وخفرع”، ووقت بناء الهرم الأحمر كان هو أعلى مبنى حجري فى العالم.

الهرم الأسود

بناه الملك أمنمحات الثالث، خلال عصر الدولة الوسطى فى مصر “2040-1640 ق. م”، وبيعتبر واحد من الأهرامات الخمسة اللي لسه باقية من مجموعة الأهرامات العشرة الأصلية في منطقة دهشور، وكان اسمه في الأساس أمنمحات الأقوياء، قبل ما يتم تسميته الهرم الأسود للظلام.