The Definitive Guide to Living in the Capital , Cairo , Egypt

تصوير: حاتم مشير

مصر مليانة متاحف مهمة، عمرها أقدم من عمر دول كتير في عالمنا، ومن المتاحف العظيمة اللي موجودة في منطقة المعادي، هو المتحف الجيولوجي المصري، والموجود على كورنيش النيل، تعالوا نتعرف أكتر على المتحف ده.

المتحف الجيولوجي المصري أنشئ سنة 1901، بعد إنشاء الهيئة العامة للمساحة الجيولوجية المصرية في سنة 1896، واللي أمر بإنشائها الخديوي إسماعيل، وبيعتبر المتحف ده هو الأول من نوعه في الشرق الأوسط والعالم العربي وأفريقيا.

أول أمين للمتحف هو تشارلز وليم أندروز، وده كان سنة 1904، وبعده مسك المنصب هنري أوربورن سنة 1906، أما الدكتور حسن صادق فكان أول أمين مصري للمتحف.

احتفل المتحف الجيولوجي المصري باليوبيل الماسي سنة 1979، وفي السنة دي صدر طابع بريد تذكاري لتوثيق المناسبة دي.

والمتحف ده تابع للهيئة العامة للمساحة الجيولوجية، واللي كان الغرض من إنشائها هو دراسة كل أنواع الصخور والتربة بالأراضي المصرية والرواسب المعدنية وغيرها.

المتحف مبني على الطراز اليوناني الروماني، داخل حديقة وزارة الأشغال، وافتتح للجمهور في الأول من ديسمبر سنة 1904، وكان وقتها بيضم حفريات لحيوانات فقارية وثديية تم جمعها من محافظة الفيوم سنة 1898.

وفضل المتحف في مكانه داخل حديقة وزارة الأشغال لحد سنة 1982، ولحد ما تم هدم المبنى الأصلي لإنشاء مترو أنفاق القاهرة، وبعدها تم نقل مقتنيات المتحف لموقعه الحالي على كورنيش النيل.

مقتنيات المتحف

بيحتوي المتحف على أكتر من قاعة، بتعرض فيها مقتنيات المتحف بطرق علمية حديثة وبيشرف عليها مجموعة من الجيولوجيين، وهي صالة عرض المعادن والصخور، اللي فيها مجموعة كبيرة من المعادن والخامات المعدنية بمصر، وفيها كمان مجموعة من الأحجار الكريمة ومجموعة من الكهرمان والأصداف المشغولة والخاصة بالأسرة الملكية السابقة ومجموعات من الياقوت والسافير الطبيعي والصناعي.

والمتحف فيه كمان العديد من الحفريات الفقارية وهيكل عظمي كامل لحوت من نفس النوع اللي تم اكتشافه سنة 1901 بواسطة العالم الإنجليزي بيدنل، إضافة إلى اكتشاف العالم جورج شفينفورث عام 1879 عن أول عظام متحجرة في بحيرة قارون بالفيوم.

كمان بيضم المتحف نيزك مصدره كوكب المريخ، وهو نيزك سقط على قرية نخلة في محافظة البحيرة سنة 1908، وبيعتبر واحد من 33 نيزك بس على مستوى العالم مصدرهم المريخ.

العنوان: كورنيش المعادي، أمام الباخرة نايل كريستال، أقرب محطة مترو هي محطة الزهراء على خط حلوان.

مواعيد الزيارة: من 9 صباحًا إلى 2.30 مساءً