عدن: مخيم هادىء وبسيط في نويبع
Soraya Morayef
لرحلة مريحة وهادية في نويبع، هـ تلاقي كامبس أو مخيمات
كتير ممكن تختار منها، و لو انت مش مهتم قوي بالرفاهية وممكن تروح كامب عادي، يبقى
جرب «عدن- Edn».
هـ
تلاقي «عدن» على ساحل نويبع في الكيلو 46 بعد طابا، وحوالي 5 دقائق سواقة من
«بساطة» و«اناندا»، «عدن» موجود ما بين مخيمات مشابهة له «سندس» و«الواحة» او Oasis، ومن الناحية
التانية هـ تلاقي «بواكي» اللي فيه أحلى منطقة للسباحة وإحنا بـ نرشحه لك بشدة.
الحاجة
الحلوة اللي في «عدن» هي موقعه، لأنه لو مش عاجبك تقدر بكل بساطة تمشي كام متر
عشان تشوف المخيمات التانية اللي جنبه. وكمان في المواسم وفي أوقات الأجازات
الرسمية، الساحل كله بـ يتحول لمكان تجمع كبير للناس وممكن تتنقل من مخيم لـ مخيم
تاني عشان تقابل صحابك أو تشارك في حفلات وتسمع أغاني مع أصحابك. وفي الأوقات اللي
مش فيها زحمة بـ يبقى المكان هناك بس للراحة وبـ يبقى هادي جداً ومناسب للناس اللي
بـ تحب ترتاح على الشاطىء وتقرأ كتاب أو تشرب عصير برتقال فريش.
المخيم
فيه كوخ أساسي بـ يعمل كمطعم ولاونج Lounge، وفيه مكان صغير
للقعدة وحمام صغير وقديم في ظهر الخيمة. أماكن الإستحمام موجودة في نهاية المخيم.
وهناك هـ تلاقي صفين من الخيم على البحر، ممكن تختار خيمة عالية وليها بلكونة، أو
خيمة مباشرة على الرمل وليها بلكونة صغيرة ومرجيحة.
كل
خيمة فيها سرير لفردين بمرتبتين رفيعين و طقم مفروشات السرير. ولو انت من الناس
اللي ممكن تتضايق من المفارش اللي مش بتاعتك، ممكن تجيب معاك المفارش والمخدات
بتاعتك. وهـ تلاقي هناك الناموسية متعلقة، وفعلاً بالليل هـ تحتاجها لأن الناموس
بـ يبقى متوحش هناك. جنب الشبابيك الخشب هـ تلاقي مراية صغيرة وترابيزة صغيرة، ومهما
كانت الخيمة بتاعتك بسيطة وصغيرة جداً، كده كده انت المفروض تقضي معظم وقتك برة
أصلاً.
الشاطىء
في «عدن» فيه أماكن ظل قليلة ممكن تقعد فيها، ممكن تقعد على المرجيحة او المخدات
الكبيرة، وكمان فيه قعدة مربعة صغيرة فيها مخدات كبيرة وترابيزة قصيرة عشان تقعد
عليهم وتشرب شاي مرمرية وتبص في النجوم وتسرح. وكمان فيه البدال في البحر اللي بـ
يستخدموه العاملين في «عدن» عشان يصطادوا بيه، بس هما لطاف جداً ولو إستأذنت منهم
بطريقة كويسة عشان تستخدمه هـ يخلوك تستعمله.
بسعر
60 جنيه للفرد في الليلة الواحدة، تبقى الإقامة في «عدن» مش الأرخص في المنطقة، والدخل
هناك بـ ييجي لهم أكتر من الأكل. العشاء أو الفطار ممكن يوصلوا لـ 60 جنيه،
والعصائر والصودا ما بين 10 جنيه و15 جنيه. يعني لو هـ تاكل 3 وجبات في اليوم،
يبقى توقع أنك ممكن تدفع 400 جنيه في 3 أيام هناك.
المنيو
في المطعم فيه الأطباق الأساسية زي مثلاً الفول، بيض أومليت، وشكشوكة للفطار،
وفراخ مشوية وسمك طازة من البحر مع أرز للغذاء. جرب عندهم السمك المشوي، والبيتزا
بالخضار، العيش البدوي الطازة، والبان كيك بالشيكولاتة والموز، بـ نرشحه لك خصوصاً
بعد يوم طويل في الشمس. لو الأكل عندهم ماعجبكش، ممكن تروح «سندس» وتطلب وجبة الكاليماري
المقلي، واللي بـ ييجي معاها طبق سلطة طحينة حلوة قوي وأرز وسلاطة، وعيش بدوي لسة
مخبوز وطازة.
«عدن»
إختيار رائع في نويبع لو انت رايح مع مجموعة كبيرة، أو لو انت عايز هدوء وراحة في
مكان بـ يطل مباشرةً على شاطىء البحر الأحمر الجميل. المخيم على ساحل مفتوح وموقعه
حلو جداً لركوب الأمواج والإبحار وللتجديف. للحجز إتصلوا على: 0124939262.
