The Definitive Guide to Living in the Capital , Cairo , Egypt

الصورة من هنا.

الفترة دي، بيحتفل متحف الأقصر، المطل على كورنيش النيل بمحافظة الأقصر، بعيد ميلاده الـ٤٦، ودي فرصة هايلة تسيب القاهرة وتسافر محافظة الأقصر علشان تستمتع بجمال المتحف ده، واللي بمناسبة عيد ميلاده بيستضيف حاليًا معرض “كنوز الوزير إمنحوتب حوي”.. تفاصيل أكتر في السطور الجاية.

بحسب تصريحات إعلامية للدكتور علاء المنشاوي، مدير عام متحف الأقصر، معرض “كنوز الوزير إمنحوتب حوي” بيضم ١٥٥ قطعة أثرية من مكتشفات البعثة الإسبانية العاملة بمقبرة الوزير إمنحوتب حوي، من الأسرة الـ 18، ومن أهم القطع دي لوحة من الحجر الجيري مزينة بصلوات الإلهة “رع حور أخت”.

وبيعتبر متحف الأقصر واحد من أهم المتاحف اللي بتضم الاكتشافات الأثرية المتتالية اللي بتظهر في الأقصر، بهدف جذب السياح حول العالم للتعرف على الاكتشافات دي.

ومتحف الأقصر للفن المصري القديم من أجمل المتاحف الإقليمية في مصر، وهو بيقع على الضفة الشرقية لنهر النيل، وبيزين كورنيش النيل فى وسط محافظة الأقصر.

أُنشئ المتحف مخصوص لإعادة إحياء الفن بمدينة طيبة القديمة، وبيضم أكثر من 3000 قطعة أثرية معروضة، وأكثر من 3000 قطعة محفوظة داخل المخازن المتحفية.

بيتكون المتحف من 5 قاعات للعرض؛ هي: القاعة الأولى، وقاعة سوبك، وقاعة الخبيئة، وقاعة الدور العلوي، وقاعة مجد طيبة العسكري والتقني.

وبيلقي المتحف الضوء على الفن المصري القديم الخاص بمدينة طيبة “الأقصر” عبر العصور، بداية من عصور ما قبل التاريخ، والدولة القديمة، والدولة الوسطى، والدولة الحديثة المعروفة بـ “العصر الذهبي”، والعصرين اليوناني والروماني، والفن القبطي، والعصر الإسلامي.

ومن أهم القطع المعروضة بالمتحف تمثال من الشست الأخضر بيصور الملك تحتمس الثالث وهو شاب، وتمثال فريد من المرمر للملك إمنحوتب الثالث مع الإله سوبك، وتمثال من حجر الكوارتز للملك إمنحوتب الثالث وهو واقف، ولوحة رائعة للملك كاموس بتعد من الآثار النادرة في المتحف، ومومياء الملك أحمس الأول مؤسس الأسرة الثامنة عشرة.

تم افتتاح المتحف للزيارة فى ١٢ ديسمبر عام ١٩٧٥م، وبعدها أضيفت له صالة جديدة عام ١٩٨٤م، كمان تم افتتاح قاعة الخبيئة عام ١٩٩١م، وبتعد من أهم قاعات المتحف؛ ثم افتتحت قاعة مجد طيبة فى عام ٢٠٠٤م.

عنوان المتحف: كورنيش النيل، مدينة الأقصر.

تليفون: 0952370569

المتحف بيشتغل فترة صباحية وفترة مسائية.