شارع المعز.. دليلك لخروجة مميزة يوم المولد النبوي 2023
أماكن إسلامية في القاهرة اجازة المولد النبوي في مصر التاريخ الإسلامي المولد النبوي الشريف موعد اجازة مولد النبي مولد النبي 2023ن شارع المعز
Cairo 360
فاضل أقل من أسبوعين على مناسبة إسلامية جميلة، وهي المولد النبوي الشريف للعام الهجري 1445 والميلادي 2023. ومؤخرًا أعلنت الحكومة المصرية إن إجازة المولد النبوي الرسمية هتكون يوم الخميس الموافق 28 سبتمبر الجاري، وده معناه إن الويك إند هيكون 3 أيام مش يومين! طيب تروح فين في الويك إند المميز ده؟
في كايرو 360 بنرشح لكم رحلة لشارع المعز، هتشوفوا فيها أجمل المباني الإسلامية التاريخية. تعالوا نعرف التفاصيل.
الخروج للأماكن التاريخية، خصوصًا اللي فيها آثار إسلامية، أكيد هيكون له طعم تاني يوم المولد النبوي، ومن الشوارع اللي هتحسوا فيها ببهجة المولد النبوي وكأنكم رجعتكم للماضي الجميل.. شارع المعز، اللي بيتميز بوجود أماكن أثرية بطابع إسلامي فريدة من نوعها.
وبيتميز شارع المعز لدين الله الفاطمي التاريخي، بوجود العديد من المزارات الأثرية والتاريخية فيه وبهويته المصرية الخالصة، كمان الشارع فرصة رائعة لقضاء وقت ممتع مع عائلتك بأسعار مناسبة، يعني خروجة حلوة بأقل التكاليف.
هتشوف إيه في شارع المعز؟
بيقع شارع المعز في وسط القاهرة، و تم بناءه في العصر الفاطمي، ومن أهم المباني التاريخية اللي بيتميز بيها الشارع وتقدروا تشوفوها عن قرب: “ضريح سيدي الذوق، باب الفتوح، وكالة قايتباي، مسجد الحاكم بأمر الله، زاوية أبو الخير الكليبات، مسجد وسبيل وكتاب سليمان أغا السلحدار”.
كمان بيتميز الشارع بوجود أماكن رائعة زي: “بيت مصطفى جعفربيت السحيمي، مسجد الأقمر، مسجد حسن كتخدا الشعراوي، سبيل وكتاب عبد الرحمن كتخدا، قصر الأمير بشتاك، حمام السلطان إينال، بيت عثمان كتخدا، مسجد ومدرسة الظاهر برقوق، مجمع قلاوون، سبيل وكتاب خسرو باشا، مسجد ومدرسة الأشرف برسباي، مجموعة الغوري، مسجد الفكهاني، سبيل محمد علي بالعقادين، بيت الشبشيري، مسجد المؤيد شيخ، مجمع نفيسة البيضاء وباب زويلة”.
ومن فترة، نفذت وزارة السياحة و الآثار مشروع إضاءة مبهرة للشارع علشان يزيد جماله عن طريق تقنيات جديدة وباستخدام التكنولوجيا الحديثة.
والوصول لشارع المعز سهل جدًا، لو معاكم عربية هتوصلوا لحد حي الحسين، وتركنوا العربية في مكان مناسب هناك، وتتمشوا لحد الشارع، ولو بالمواصلات تنزلوا محطة مترو العتبة ومن هناك هتلاقوا عربيات الحسين اللي هتوصلكم لحد الشارع.
