The Definitive Guide to Living in the Capital , Cairo , Egypt

النهارده يعتبر يوم سعيد جدًا لمحبي وعشاق موسيقار الأجيال “محمد عبدالوهاب” بعد ما قررت دار الأوبرا المصرية فتح متحف “محمد عبدالوهاب” ومتحف “الآلات الموسيقية” الموجودين في معهد الموسيقى العربية مجانًا للجمهور لمدة أسبوع، اعتبارًا من النهارده الأحد 10 مارس بشكل يومي من الساعة عشرة صباحًا ولحد الساعة ثلاثة عصراً ولحد يوم الأحد الجاي 17 مارس.

القرار ده جه ضمن الاحتفالات بذكرى ميلاد موسيقار الأجيال والي هتكون خلال الشهر ده، مش بس كده، ده كمان الاحتفالات هتشمل أمسيات كتير هتكون على مسارح الأوبرا في القاهرة والإسكندرية ودمنهور، لمختلف فرق الموسيقى العربية، واللى خصصت برامجها خلال الفترة دي  لتقديم أشهر وأجمل أعمال عبدالوهاب.

دار الأوبرا كمان وجهت الدعوة لأطفال المدارس وطلبة الجامعات لزيارة المتحفين، لإن متحف محمد عبدالوهاب بيحكي ويوصف مشوار حياته بشكل جميل، من خلال عرض مقتنيات عبدالوهاب وإبراز حكايات طفولته ونشأته وخطواته الأولى فى عالم الموسيقى العربية والسينما المصرية، وعلاقته بالكتاب والفنانين والجوائز والتكريمات اللى حصل عليها.

وفي جزء تاني من المعرض فيه عدد من الغرف الخاصة ببيت عبد الوهاب واللي أهدتها أرملته السيدة “نهلة القدسى” لدار الأوبرا، زي أوضة نومه ومكتبه الخاص ومجموعة من قطع الأثاث اللي كان بيحبها، ده غير قاعة مخصوص للسينما للناس الغاوية أفلام، وفيها كل الأفلام اللي مثل فيها محمد عبدالوهاب بالإضافة إلى قاعة للاستماع والمشاهدة بتضم مكتبة كاملة لأعماله من موسيقى وأغاني وألبومات وصوره الخاصة مع الشخصيات العامة والفنانين.

أما متحف الآلات الموسيقية الموجود برده في معهد الموسيقى العربية، فهتلاقوا فيه مجموعة من الآلات الموسيقية القديمة، اللي تم اكتشافها لما كانوا بيرمموا المبنى، وتم تجديد الآلات دي بعناية شديدة، وعرضها على حسب طبيعتها وبتنوع بين الوتريات وآلات النفخ والإيقاع وغيرها، وجنب كل آلة منهم لوحة إرشادية تشرحلك الآلة، وجهاز بيطلع صوت الآلة دي، واللي منها آلات نادرة زي بيانو الثلاثة أرباع تون واللي بيتعزف عليه المعزوفات الشرقية، وآلة الكوتو اليابانية وآلة السينتار الهندية وآلة السانتور وآلة المندولين المعدنية اللي عزف عليها محمد عبدالوهاب فى أغنية (عاشق الروح) في فيلم (غزل البنات).