The Definitive Guide to Living in the Capital , Cairo , Egypt

أعلن الدكتور مصطفى مدبولي، رئيس مجلس الوزراء، إن المتحف المصري الكبير هيتم افتتاحه الرسمي في 2025. لكن دلوقتي المتحف مفتوح جزئيًا، يعني تقدر تستمتع بزيارة أجزاء كبيرة من المتحف وكنوزه التاريخية. في المقال ده، هنقولك كل اللي محتاج تعرفه عن تفاصيل الزيارة، طريقة حجز التذاكر، والمواعيد.

طريقة حجز التذاكر

أول خطوة لزيارة المتحف هي إنك تحجز التذاكر من خلال الموقع الرسمي للمتحف من هنا.

أسعار التذاكر:

الأطفال وكبار السن (فوق 60 سنة): 100 جنيه.

البالغين: 200 جنيه.

الأجانب: 1000 جنيه.

إزاي توصل للمتحف؟

أفضل طريقة للوصول هي بالعربية الخاصة، أو المواصلات العامة لحد ميدان الرماية، بس لسه مافيش مواصلات مباشرة للمتحف، وده متوقع يتغير قريب. نصيحة: تابع حالة الطقس علشان تلبس اللبس المناسب.

أهم المحطات داخل المتحف

البهو العظيم

أول ما تدخل المتحف هتلاقي نفسك في البهو العظيم اللي بيضم تمثال الملك رمسيس الثاني اللي وزنه 85 طن وطوله 11 متر. كمان هتلاقي عمود النصر للملك مرنتباج، اللي بيحكي عن انتصارات الفراعنة.

القاعات الرئيسية

قاعة عصر القوة: هنا هتلاقي آثار الحرفيين اللي شاركوا في بناء الأهرامات، مع فخار ومنحوتات أدواتهم اليومية.

قاعة المعتقدات الدينية: فيها عرض شامل لآلهة المصريين القدماء وطقوس الحج لأبيدوس.

قاعة الدولة الحديثة: بتعرض مقتنيات الملكات زي حتشبسوت وتماثيل الملك إخناتون اللي بيعرفك على عصر التوحيد.

قاعة العصر المتأخر: بتوضح تأثير الحضارات الرومانية والإغريقية على الفن المصري القديم.

مراكب الشمس

هنا هتشوف سفينة الملك خوفو المشهورة اللي كانت مدفونة جنب الهرم الأكبر، واللي بتعبر عن إيمان المصريين القدماء بالحياة بعد الموت.

الدرج العظيم

الدرج بيضم 60 تمثال ملكي بتحكي رحلة الملوك للحياة الأبدية. من آخر الدرج هتشوف مشهد مهيب بيطل على الأهرامات.

متحف الأطفال ومناطق الترفيه

• للأطفال: عروض الواقع المعزز، مجسمات مستدامة، وتماثيل بطريقة برايل لذوي الهمم.
• كمان فيه منطقة تجارية فيها منتجات يدوية ومطاعم وكافيهات بإطلالة على القاعة الرئيسية.

مواعيد العمل:

• مجمع المتحف: من 8:30 صباحًا لـ6 مساءً.
• قاعات العرض: من 9 صباحًا لـ5 مساءً.
• آخر موعد لحجز التذاكر: الساعة 4 عصرًا.

دلوقتي الزيارات محدودة العدد لاختبار جاهزية المتحف، بس تقدر تزور البهو العظيم، الدرج العظيم، والقاعات الرئيسية. قاعة الملك توت عنخ آمون هتفضل مقفولة لحد الافتتاح الرسمي.

لحجز التذاكر أونلاين: اضغط هنا.