The Definitive Guide to Living in the Capital , Cairo , Egypt

كل مساجد ربنا مليانة روحانيات، لكن في مساجد بتاخدك لعالم تاني بطاقة إيجابية وجمال معماري يخليك تحب الصلاة فيها أكتر. مع الروحانيات بتيجي العمارة المميزة اللي بتزود الإحساس بالجمال والراحة. عشان كده، النهاردة هنقولك على 5 مساجد تاريخية في مصر تستحق الزيارة في رمضان، هتملى قلبك روحانيات وعينك بجمال العمارة الإسلامية الفريدة.

وقبل ما نبدأ، خلينا نقول معلومة دينية جميلة: معظم المساجد القديمة تصميمها بيعتمد على رقم 8، وده لأن عرش الرحمن بيحمله 8 حسب الآية الكريمة: “ويحمل عرش ربك فوقهم يومئذٍ ثمانية” (الحاقة: 17).

الطنبغا المارداني

المسجد ده اتبنى سنة 1339 ميلادية على طراز المساجد الجامعة، وبيضم 3 أبواب ومئذنة من 3 أدوار، وقبة بتتسند على 8 أعمدة جرانيتية قدام المحراب. في وسط الصحن، فيه نافورة جميلة ثمانية الأضلاع، والسقف مزخرف بزخارف مملوكية ملونة، أما الجدران فمكسية بالرخام والصدف.

المسجد بناه الطنبغا عبد الله المارداني، واحد من مماليك السلطان الناصر محمد بن قلاوون، وكان معروف بجماله وكرمه، لكنه اتسجن وبعد ما خرج سافر لحلب ومات هناك.

العنوان: شارع التبانة – باب الوزير – الدرب الأحمر.

جامع عمرو بن العاص

الجامع ده معروف بلقب “تاج الجوامع”، لأنه أول مسجد في مصر وإفريقيا، بناه الصحابي عمرو بن العاص سنة 641 ميلادية بعد فتح مصر، وساعد في بنائه بعض الصحابة زي الزبير بن العوام وعبادة بن الصامت.

كان المسجد وقتها بيستخدم كمكان لاجتماع المسلمين، واتأسس بجذوع النخيل والجريد، وبعدها حصلت عليه تعديلات معمارية كتير لكنه لسه محتفظ بروحه الإسلامية العريقة.

العنوان: ميدان جامع حسن الأنور – مصر القديمة.

مسجد أحمد بن طولون

اتأسس المسجد سنة 876 ميلادية لما استقر أحمد بن طولون في الحكم، واختار جبل يشكر مكانًا له، واللي بقى النهاردة ميدان أحمد بن طولون.

أشهر ما يميز الجامع المئذنة الحلزونية، اللي بتشبه طراز مسجد سامراء في العراق. كمان فيه 6 محاريب، ونافورة وضوء في منتصف المسجد عليها قبة بتتسند على أعمدة رخامية، أما الزخارف الجصية الهندسية والنباتية فبتزين الشبابيك بشكل رائع.

العنوان: ميدان أحمد بن طولون – السيدة زينب.

مسجد السلطان حسن

ده واحد من أضخم مساجد مصر وأعلاها بنيانًا، وبيتلقب بـ”دُرة العمارة الإسلامية”. المسجد ده كان أكتر من مكان للصلاة، لأنه كان مدرسة ضخمة لتدريس المذاهب الفقهية الأربعة، وفيه صحن واسع بنافورة محاطة بـ 4 إيوانات ضخمة، بجانب قاعات خاصة للطلاب.

المسجد ليه مئذنتين ضخمتين، واستخدم قبل كده كحصن، واترمى من سطحه المجانيق على القلعة في صراعات المماليك. بيتميز بتصاميمه الحجرية الدقيقة، والزخارف الهندسية والنقوش الكوفية، وكمان أعمال الرخام المبهرة في المحراب والمنبر.

العنوان: ميدان صلاح الدين – الدرب الأحمر.

مسجد الحاكم بأمر الله

بدأ بناء المسجد سنة 989 ميلادية في عهد الخليفة العزيز بالله الفاطمي، لكنه توفى قبل ما يكمله، فاستكمله ابنه الحاكم بأمر الله، اللي سُمي المسجد باسمه.

المسجد مبني على طراز المساجد الجامعة، وفيه صح مكشوف وأربع دعامات ضخمة شايلة السقف، أما مأذنته فشكلها فريد وبتشبه المبخرة. كان المسجد في البداية مقر لجمع التحف الأثرية، واتجدد أكتر من مرة، وآخر تجديد حصل سنة 2023 بعد تطوير استمر 6 سنوات.

العنوان: شارع المعز لدين الله – الجمالية.