The Definitive Guide to Living in the Capital , Cairo , Egypt

الصورة الرئيسية: abdullah ali

كثير مننا مضغوطين ومحتاجين يخرجوا من الموود الرسمي شوية لموود ترفيهي، خاصةً أن الشغل الفترة دي بقى مرهق بسبب حرارة الجو الشديدة، علشان كدة بنحتاج نفصل. إحنا كمان قررنا نفصل من الضغوط، ونطلع رحلة مخصوص لمدة يوم واحد “داي يوز” لمدينة الإسكندرية الساحرة. وفي السطور الجاية هننقل لكم تفاصيل تجربتنا هناك، اللي خلت موودنا أحلى وهونت علينا ضغط الأيام والجو.

في الأول خلونا نقول لكم أنكم تقدروا تروحوا الإسكندرية عن طريق المواصلات العامة “ميكروباص” من رمسيس أو الهرم، وكمان تقدروا تاخدوا أتوبيس تابع لإحدى شركات النقل، أو أنكم تروحوا بعربيتكم وتستمتعوا بكل خطوة في الطريق.

رحلتنا بدأت بعربيتنا من القاهرة بدري، وقطعنا “كرتة” بـ10 جنيه على الطريق، والإفطار بتاعنا كان في مزارع دينا على الطريق، وعندهم اختيارات كتير للإفطار وإحنا طلبنا فطير مشلتت الحجم الصغير اللي معاه 2 طبق من اختياركم، وإحنا طلبنا “جبنة وعسل”، بـ135 جنيه، وكمان طلبنا رول تشيكن ستريبس بسعر 158 جنيه، وكمان جربنا تشيكن باربكيو رول وسعره كان 145 جنيه، والطعم كان أحلى حاجة في الأكل كله، وحقيقي الإفطار في مزارع دينا من المبهجات في رحلتنا للإسكندرية، وممكن كمان تفطروا في ماستر سندوتشات وأطباق متنوعة أو في كافيه الواحة على الطريق وممكن تاخدوا سندوتشات معاكم تاكلوها مع نفسكم في أي مكان.

وصلنا الإسكندرية وقررنا أول حاجة نزورها متحف المجوهرات الموجود في سان ستيفانو، وسعر تذكرة الدخول للكبار 20 جنيه، وللأطفال 5 جنيه، وخلوا بالكم الدفع فيزا فقط ومافيش كاش، وأول ما دخلنا عرفونا التعليمات اللي ملخصها أنه ممنوع تصوير الفيديو أو استخدام الفلاش، ولازم نلبس كفر في رجلينا أثناء الجولة، وبصراحة المكان ده هيفضل يبهرنا طول الوقت بجمال المعروضات فيه وتصميمها وكل حاجة.

خلصنا وقررنا ننزل محطة الرمل اللي هي وسط البلد بالنسبة لنا، وركننا العربية في مول كارفور اللي في شارع صفية زغلول، وبالمناسبة سعر الباركينج كان 20 جنيه بس لمدة ساعتين تقريبًا، وبما أن الجو كان حر شوية فقلنا نعمل شوبينج في المول اللي اكتشفنا فيه تخفيضات رهيبة لمحلات كبيرة كان أبرزها أديداس اللي اشترينا منه شنطة بـ1000 جنيه، وتيشيرت الأهلي الأصلي بـ230 جنيه، وشوز بسعر 1200 جنيه، وعملنا شوبينج معتبر في محلات المول وخرجنا منه علشان نستمتع بأهم حاجة في الإسكندرية.. البحر!

قررنا نروح ديفولي دوم سيدي جابر، وهو عبارة عن مجمع كافيهات مميز، وفيه باركيتج داخلي سعره 50 جنيه، واخترنا نقعد في كافيه برنسيس لأنه كان أقرب حاجة للبحر وبدون حواجز، وطلبنا إسبانيش لاتيه وسعره 64 جنيه، وفانيليا تشيك سعرها 96 جنيه، وصن رايز بسعر 86 جنيه، وكابتشينو بسعر 67 جنيه، وبطاطس محمرة لأننا كنا جعانين ولسه مجاش موعد الغداء وكان سعرها 40 جنيه، والمياه الصغيرة عندهم بـ21 جنيه، وعندهم جودة ممتازة وخدمة مقبولة وانبسطنا من اختيارنا واستمتعنا بالبحر.

أما الأكل الحقيقي فكان عند أبو نورا في رأس التين منطقة بحري، وهو محل سمك بتختاروا الأول هتاكلوا من عندهم إيه من الأسماك الطازجة وبتختاروا كمان طريقة التسوية، وبيكون الحساب حسب الوزن والنوع اللي بتطلبوه وتقدروا تعرفوا سعر كل حاجة قبل ما تختاروا ومتوسط سعر الفرد لو أنتم أسرة أو شلة من 4 أفراد 350 جنيه، وممكن يبقى أقل أو أكتر حسب اختياراتكم وخلينا نقول إن الجمبري بتر فلاي والبوري المشوي والكابوريا وشوربة السي فود كانوا حاجة عظمة، ولكن الأرز عندهم ماكنش واو.

ولو عاوزين تاكلوا كبدة وأكل مصري حرش يبقى عليكم وعلى محل فرج أبو خالد بس خليكم في فرع الترام مش الكورنيش علشان إحنا دايمًا بندور على الأصل.

خلصنا الأكل وقررنا نتمشى من بحري للمنشية علشان نهضم علشان اللي جاي تقيل، ووصلنا لحد “جيلاتي فهمي” وده بقى إحنا بنعشق عنده “أم علي” واللي سعرها يبدأ من 20 جنيه حسب الإضافات، وكمان عندهم الأرز بلبن سعره بيبدأ من 15 جنيه، والآيس كريم خدوه معاكم وأنتم ماشيين تتسلوا فيه، والسعر عندهم بيبدأ من 10 جنيه، وعنوانه شارع الشيخ سليمان – المنشية.

خلصنا رحلتنا ورجعنا للقاهرة بعد ما انبسطنا وفرحنا وغيرنا جو، ورغم أن جدولنا كان فيه أكتر من مكان حابين نروحه ومقدرناش بسبب أن الرحلة يوم وحد صد رد، لكن الرحلة بشكل عام كانت مبهجة وخرجتنا من الضغط.

ونصيحتنا لكل شخص حابب يجرب رحلة اليوم الواحد للإسكندرية؛ لازم تتحرك من القاهرة الفجر، ولو حابين تنزلوا البحر يبقى عليكم بالشواطئ الخاصة أو شواطئ القوات المسلحة، وأهم نصيحة بنقدمها، بلاش تجروا ورا أسماء المطاعم الرنانة واللي بيقولوا عليها أحسن حد بيعمل كذا، لأن فيه أفضل منهم كتير بس هما واخدين السمعة فقط، وقريب هنكرر الرحلة في مدينة ساحلية تانية علشان يبقى عندكم اختيارات كتير للداي يوز على البحر.