دليل كايرو 360 للهروب من زحام القاهرة إلى غرب سهيل في أسوان
Nagla Ashraf
كثير مننا بيدور على مكان مختلف وجديد يقضي فيه أجازة ممتعة بعد الشغل والتعب أو المذاكرة طول السنة، وطبعًا في الشتاء الأقصر وأسوان لهم أسبقية الحجز بس اللي مش كل الناس تعرفه أن فيه مكان اسمه غرب سهيل في أسوان وساعات يطلقوا عليه في الرحلات السياحية "القرية النوبية". في الفترة الأخيرة انتشرت صور جميلة كثير بتبين الثقافة النوبية بألوان بيوتهم الجميلة وإزاي أن دائمًا تلاقي شوارعهم نضيفة لأن كل حد بينضف أمام بيته وده حقيقي فعلًا، كمان جمال الطبيعة وطباع الناس يخليكم مش عاوزين تمشوا أبدًا.
هناخدكم في رحلة سريعة لهناك بكل التفاصيل من أول تروحوا إزاي؟ لحد أحسن أماكن تشتري منها تذكار وتوابل وأحسن الـ Guest houses هناك. نبدأ بالسفر فيه ناس بتحب تروح أسوان بالطيران والمدة تقريبًا ساعة، وتكلفتها حوالي 1300 جنيه وبتختلف على حسب الوقت والدرجة اللي بتختارها، أما القطر وإن كان متعب شوية علشان بياخد حوالي 12 ساعة سفر، وقطارات النوم بحوالي 350 جنيه للفرد، وتذكرة الدرجة الأولى في القطر اللي مش بيقف كتير حوالي 125 جنيه، والدرجة الثانية 70 جنيه.
وأول ما بتوصلوا المطار أو القطر بتاخدوا تاكسي من هناك لغرب سهيل، وطبعًا يفضل أنكم تكونوا متفقن مع guest house يخلي حد يستناكم هناك لو أول مرة تروحوا، وتكلفة التاكسي من محطة قطر أسوان لهناك 30 جنيه مش أكثر إلا لو معاكم شنط كتير أنتم وذوقكم بقى.
أول ما وصلنا غرب سهيل (القرية النوبية) دخلنا في شارع طويل على الناحيتين محلات عطارة وشنط وشيلان وتذكارات خفيفة زي الطواقي والأعقاد، وفي نفس الشارع ده على الناحيتين – ناحية النيل اللي منظره مع الخضرة والجبل يجنن، والناحية التانية اللي وراها بشوية عمارات وبيوت نوبية – كل الـ Guest Houses.
هو أول واحد وهو بعيد شوية عن السوق لأنه فوق على مرتفع وسط عمارات وبيوت الأهالي وإيكادولي دي كلمة نوبية معناها "أنا بحب"، والمكان حلو جدًا ويعتبر أرخص واحد من ناحية الأسعار فيهم كلهم سعر الغرفة الدوبل 250 جنيه، مشكلته الوحيدة أنه بعيد عن السوق والنيل وفي عمارة طويلة مش مبنى من دورين، فلو معاكم ناس كبيرة في السن الموضوع هيكون مرهق جدًا بالنسبة لهم.
بعد كده على طول الشارع على اليمين والشمال فيه guest houses كثيرة جدًا تبقى محتار تروح أنهي واحد فيهم عجبنا أثنين بس اللي ننصح بهم هم أناكتوه و أونتي كا، وفيه بيوت ثانية كثير زي حدوتة مصرية مثلًا واللي كان تجربتنا في الأكل عندهم سيئة جدًا للأسف.لكن أشهرهم وأغلاهم وأحلاهم طبعًا "أناكتوه" Anakatoh
وبالمناسبة فيه 3 فروع لأنكاتوه وكلهم على النيل، شكل غرف الأوتيل بيكون على شكل بيوت صغيرة دور واحد معمولة من طين بألوان مميزة ومنظر النيل اللي بتصحى وتقوم عليه يخليك توافق تدفع المبلغ اللي هم طالبينه وهو للغرفة المنفردة حوالي 1100 جنيه، وللمزدوجة 1400 جنيه، أما الثلاثية 1740 جنيه في الليلة الواحدة، وبما أن ده غالي شوية لبعض الناس.
فندق "نوبيان دريم" Nubian Dream
واللي يعتبر مش على النيل على طول هو ثاني صف بس لأنه دورين والدور الثاني هو اللي فيه غرف السياح أما الدور الأول فبيعيش فيه أهل البيت ودي طبيعة القرية النوبية لأن معظم الـ Guest houses بيعيشوا فيها أهل البيت، الست بتطبخ للسياح الأكل والرجل وأخواته أو قرايبه بيضايفوا السياح، وأسعار "نوبيان دريم" بتكون حوالي 350 للفرد في الغرفة المزدوجة، ولو أنت عاوز تحجز بتتكلم تحجز على 01116470859.
أما أكثر مكان أسعاره مقبولة بالنسبة لنا وتقدر تأكل فيه أجمل أكل بيتي في حياتك وعلى النيل على طول هو "أونتي كا" ومعناه بيت القمر.
مكانه على طول على النيل جنب أناكتوه ومكون من دورين، برضه الدور الثاني لغرف السياح، وسعرها للغرفة المزدوجة من 300 جنيه لـ 450 جنيه على حسب الوقت وإذا كان معاكم سياح أجانب أو لأ، ده غير أنه فعليًا ما ينفعش تروح النوبة من غير ما تجرب تتغدى عندهم، لأن أكله تحفة، الخضار أو الفراخ المشوية أو المحشية حكاية. ده غير سعات بيجبوا مغني أو فرقة نوبية تعمل شو للسياح الأجانب أو المصريين. وللحجز ممكن تتصلوا بالنمرة دي 01226412641.
أما بالنسبة للأنشطة اللي ممكن تعملوها هناك نحب نقولكم أنكم مش هتزهقوا أبدًا ونبدأ
بالتسوق
طبعًا ده حاجة أساسية وننصحكم أنكم أول يوم تعملوا جولة تشوفوا فيها الأسعار علشان ما يضحكش عليكم، يعني مثلًا الطاقية النوبي ممكن حد يفتكركم زبون ويبعها لكم بـ 35 جنيه، في حين أن ثمنها 10 جنيه، ولو يعني قفلت معاهم بتكون 15 جنيه علشان خامة أقيم.
طبعًا أنتم ممكن بمتهى السهولة تاخدوا تاكسي وتروحوا سوق أسوان واللي يعتبر أفضل مكان تشتري منه عطارة زي الكركديه والفول السوداني والتوابل المختلفة. وشارع السوق ده جنب محطة القطر على طول دقيقتين مشي،وهو يعتبر شارع طويل جدًا من عند المحطة بطول الكورنيش لحد كنتاكي تقريبًا، والشارع شبه منطقة الحسين والغورية عندنا جدًا سواء بالمحلات أو الباعة الجائلين وأسعار الحاجة طبعًا.
كمان ما يفتكمش تجربة الفلوكة في النيل
من أجمل الحاجات اللي بهرتنا في أسوان النيل وجماله، أنت ممكن تركب فلوكة من المرسى اللي هو عند أناكتوه 3 وتلف بيك حوالي نصف ساعة بـ 150 جنيه وإحنا كنا عددنا 6 أفراد، فلما تقسموا المبلغ على نفسكم الدنيا بتكون لطيفة.
كمان ممكن تتفق مع تاكسي أو عربية ميكروباص لو عددكم كبير وتروحوا معبد فيلة اللي بيتراح برضه بفلوكة في النيل وبتكون لفة حلوة جدًا خاصة لو رحتم بعدها جزيرة هيصا أو على الجزر اللي في الناحية التانية منها ونزلتم المياه، بس نصيحة المياه حتى في عز الحر بتكون تلج، فلو أنتم من محبي التهور والجنان انزلوا بس لازم في المكان الأمان اللي يحددوه المراكبي علشان الدوامات.
سهرة مع مغني من النوبة أو فرح نوبي
للأسف معظم الناس بتانم من الساعة 8 بليل تقريبًا، ومش بيكون فيه أنشطة كتيرة غير أننا نتفرج على المحلات ولحد الساعة 10 بالكتير، بس المميز أن كل يوم في guest house مختلف بيكون فيه مغني بيغني أغاني شعبي للأجانب أو للسياح، بس هيكون حظكم حلو جدًا لو حضرتم زفة نوبي أو فرح نوبي لأنهم فعلًا بيكونوا جمال جدًا.
التأمل
النوبة من الأماكن القليلة جدًا أنك ممكن تفضل طول اليوم قاعد قدام النيل وما تزهقش، ما بين مراكب بتعدي وطيور حولك وجو جميل خاصة لو في الشتاء، ممكن تفضل تتأمل الجمال اللي حولك وتتمشى هناك في أمان تام، ولو زهقت ممكن تجرب تاخد جولتك على جمل هتنبسط برضه.
التصوير والرسم
لو أنت من هواة التصوير هتاخد أجمل صور ممكن تصورها في حياتك، ما بين ملامح الناس الجميلة وبساطتهم، والطبيعة الخلابة تقدر طول ما أنت هناك تصور وتستمتع بالطبيعة، برضه لو أنت بتحب ترسم هتلاقي أكثر من مشهد جميل سواء على النيل أو المعابد أو مع الأطفال.
رحلة سريعة للأقصر لركوب الـ Hot Air Ballon
لو أنتم من هواة المغامرة والتنطيط لازم تجربوا تاخدوا القطر وتطلعوا على أقصر مدة السفر 3 ساعات بس، وتكونوا حاجزين مع شركة محترمة وتخوضوا مغامرة ركوب الـ Hot air ballon، واللي بيلف بيكم كل معالم الأقصر السياحية، لمدة نصف ساعة تقريبًا والأقصر من الأماكن القليلة اللي فيها التجربة دي، إحنا حجزنا مع شركة السندباد، وتكلفة لفرد 250 جنيه، المشكلة الوحيدة اللي قابلتنا إن معاد الرحلة بيكون الفجر يعنى لازم نكون في الأقصر الساعة 5 الفجر، وبما اننا في أسوان ركبنا أخر قطر الساعة 10 مساءً ووصلنا الأقصر الساعة 1 وقضين حوالي 3 ساعات في شوارع الأقصر اللي برضه بتقفل بدري جدًا حتى ماكدونالدز واللي كان قريب من القطر بيقفل الساعة 2. فننصحكم تبقوا تخلوا أخر يوم من الرحلو في الأقصر تحجزوا في أوتيل وتمشوا بالقطر من هناك هيكون أريح كتير.
خلصت جولتنا في أسوان بس الذكريات هتفضل معانا لحد ما نرجع تاني، لأن المكان ده مبهج ومريح للأعصاب لدرجة تخليكم عاوزين تقضوا فيه باقية حياتكم مش مجرد زيارة سريعة بس.
