The Definitive Guide to Living in the Capital , Cairo , Egypt

الصور: الكاتب الصحفي سيد محمود

بعد سنوات من الإغلاق والتطوير، رجع لنا المتحف الزراعي بالدقي وبدأ في استقبال زواره من جديد في 2025، علشان يقدم تجربة فريدة بتجمع بين التاريخ والتراث والطبيعة في مكان واحد. بيمتد المتحف على مساحة تقارب 30 فدان، وبيضم 8 مبانٍ مليئة بالمقتنيات النادرة والمعروضات العلمية والحدائق الواسعة، وده بيخليه واحد من أهم الوجهات الثقافية والسياحية في القاهرة.

أول محطة: متحف المقتنيات التراثية

أول ما تدخل من البوابة الرئيسية هتلاقي نفسك في قصر الأميرة فاطمة بنت الخديوي إسماعيل. القاعة مليانة تماثيل لفلاحين وفلاحات بريشة فنانين كبار زي حسن حشمت ومحمود مختار. من أبرزها تمثال “حاملة الماء” اللي بيجسد فلاحة شايلة جرة فوق راسها، وكمان تمثال نوبي ماسك سلة بلح. القصر نفسه متحف في حد ذاته، بسجاده وأثاثه اللي بيرجع للقرن الـ19.

ثاني محطة: متحف المجموعات العلمية

وده واحد من أكتر المباني جذب للزوار، خصوصًا اللي بيحبوا التصوير. هنا هتشوف مجسمات بتمثل مشاهد كاملة من حياة الريف، زي صانع الفخار وصانع السلال لحد المقاهي الشعبية القديمة. المبنى كمان بيعرض تاريخ الأمراض والأوبئة اللي أثرت على الإنسان والحيوان والنبات، بجانب عرض نادر لسلالات الطيور والحيوانات والزواحف حتى اللي انقرضت.

تاريخ الزراعة المصرية في صور ومعروضات

في أركان تانية من المتحف، هتلاقي عرض بصري لتطور المحاصيل في مصر زي القمح والشعير والقطن من أيام قدماء المصريين مرورًا بالعصر الإسلامي لحد إصلاحات محمد علي وجمال عبد الناصر. الخرائط الكبيرة هنا بتوضح إزاي الزراعة كانت دايمًا جزء أساسي من حياة المصريين، ومعروضات تانية بتعرض أدوات زراعية قديمة زي “المجرش” اللي كان بيستخدم في طحن الحبوب من آلاف السنين.

حدائق المتحف
الزيارة مش مقتصرة على المباني بس، لأن المتحف نفسه عبارة عن مساحة ضخمة مفتوحة فيها حدائق بتصميم فرعوني، مليانة أشجار نادرة وتماثيل متفرقة بتكمل أجواء المكان. التجول في الحدائق بيدي استراحة ممتعة بين جولة وأخرى.

المتحف الزراعي كان اسمه زمان “متحف فؤاد الأول الزراعي”، ودلوقتي بعد تطويره بمشاركة جهات محلية ودولية زي اليونسكو، بقى فعلاً تجربة سياحية وثقافية متكاملة، مش بس لمحبين التاريخ والزراعة، لكن لأي حد عايز يعيش تجربة مختلفة في قلب القاهرة.