The Definitive Guide to Living in the Capital , Cairo , Egypt

الصورة الرئيسية: JavyGo

الصورة الداخلية: MARIOLA GROBELSKA

وزارة الزراعة أعلنت عن موعد افتتاح حديقة الحيوان بحلتها الجديدة بعد التطوير الشامل، واللي متوقع يكون في سبتمبر 2025. الحديقة مش بس بتتجدد، ده كمان حديقة الأورمان جنبها بيتم تطويرها وإحيائها بشكل علمي مميز، علشان يكونوا مع بعض أكبر حديقة حيوان جوه مدينة على مساحة 112 فدان.

الوزارة كانت بتخطط تعمل تلفريك يربط بين حديقة الحيوان وحديقة الأورمان، لكن بسبب اعتراض وزارة الآثار وطبيعة المنطقة، تم الاستقرار على تنفيذ نفق بعرض 16 متر.

تجربة جديدة مع الحيوانات
طريقة عرض الحيوانات هتختلف تمامًا؛ مش هيكون فيه أقفاص! بدلها، الحيوانات هتعيش في بيئة شبيهة بالطبيعة بتاعتهم. على سبيل المثال، منطقة الأسود هتبقى محاطة ببحيرة مياه لأن الأسود بطبيعتها بتكره المياه، بالإضافة لسياج مكهرب علشان الأمان.

أنشطة ومفاجآت للزوار
مش بس كده، أسعار التذاكر هتفضل معقولة علشان تشجع أكبر عدد من الزوار. كمان هيكون فيه أنشطة جديدة ومميزة زي خيمة الطيور، اللي هتدخلها وتشوف الطيور على طبيعتها، وكمان هتشوف الحيوانات المائية لأول مرة في بيئتها تحت المياه. أما لو سائح أو عايز تعيش تجربة مختلفة، هتقدر تبات جوه الحديقة ليلة كاملة!

أما بالنسبة لحديقة الأورمان، فالتطوير بيتم تحت إشراف الوزارة وخبراء مؤهلين، مع الحفاظ على الأشجار التاريخية والنادرة اللي موجودة فيها. كل شجرة ليها كود خاص بيها بيحمل تاريخها ومكانها، بالإضافة لبحيرة فيها نبات اللوتس النادر.

في 2025، شكل حديقة الحيوان هيكون حاجة تانية خالص، تجربة تجمع بين التعليم، الترفيه، والحفاظ على التراث، وتخليها من أهم الأماكن اللي لازم تزورها في القاهرة!