The Definitive Guide to Living in the Capital , Cairo , Egypt

من أجمل أماكن القاهرة من حيث التناسق والجمال والروعة والهدوء وراحة البال، تعالوا النهارده نبقى فى حضرة السلطان حسن والجامع الخاص به، السلطان الناصر حسن بن السلطان الملك الناصر حفيد السلطان قلاوون كان ملك حازم قوي، بيحب الناس وبيعطف على الفقراء، ومتدين، قرر أنه يبنى مسجد يخلد اسمه فى التاريخ، فكان مسجد السلطان حسن.

بدأ بناء الجامع سنة 757 هـ الموافق 1356م واستمر العمل فيه من غير توقف 3 سنين، تخيلوا بقى من غير توقف، وكان السلطان بيدفع في كل يوم 20 ألف درهم وألف وزنة ذهب، وكان من الطبيعى أن كل ده يرهق ميزانية الدولة، والسلطان حسن اعترف بده فقال: “لولا أن يقال: إن ملك مصر عجز عن إتمام بناءٍ بناه، لتركت بناء هذا الجامع“.

شارك فى عملية البناء كتير من المعماريِّين والصنَّاع، لدرجة أن مافيش عامل أو صانع أو مهندس في القاهرة له علاقة بالبناء إلا واشتغل فيه، ومات السلطان حسن قبل أن ما يخلص الجامع، فقام الأمير بشير أغا الجمدار بإتمام البناء.

شوفتوا بقى الموضوع كبير إزاى؟ ده عن فكرة البناء أما الجامع من الداخل فموضوع ثانى خالص، الجامع تحفة فنية بجد، هو عبارة عن صحن كبير فيه أربعة أماكن غير الجامع ودول عبارة عن أربع مدارس فقهية مختلفة كان الطلبة بيتعلموا فيها أمور الدين واللغة، وبتظهر براعة صناعة الرخام فى القبة والقبلة والمحرابين وهى حاجات كلها مصنوعة من الرخام وعليها زخارف معمولة بعناية، وتقدر تتعرف على الصانع المصرى الأصيل لما تشوف دقة النجارة العربية والتطعيمات المجسمة في الآيات المنحوتة على جدران القبة.

أما باب المسجد النحاسي فهو مثال رائع لأجمل الأبواب المكسوة بالنحاس وهو معمول على هيئة أشكال هندسية، ما بينها محفور زخارف دقيقة متداخلة فيها المربع مع المثلث مع الدوائر وكأن هناك عالم هندسة اشتغل مصمم أبواب فى العصر ده.

ومن كثر روائع الفن اللى موجودة فى المسجد مش هتعرف تفرق بين الأكواب النحاسية اللى بتنور وجنبها التشكيلات الزجاجية اللى بتكتشف أنها معمولة للإضاءة برضه، هتفضل عينك تروح يمين وشمال وفوق وتحت لا ترى إلا بديع الفنان المصرى الأصيل، لدرجة أن دار الآثار العربية بالقاهرة احتفظت عندها بتحف نادرة كثير وكلها كانت فى الجامع.

مساحة الجامع تقريبًا 8 آلاف متر مربع فى مكان مرتفع جنب قلعة الجبل (يووووووه معلش شكلنا دخلنا فى العصر قوى وعيشنا فيه) قصدى قلعة صلاح الدين، وكأن السلطان حسن كان مُصر أن الجامع يكون في أعلى مكان في القاهرة وبالضبط جنب قلعة صلاح الدين الأيوبي، الرجل ده كان عاوز يوصل رسالة بتقول أن مصر فيها الحراسة والقوة اللى بتمثلهم القلعة وكمان فيها العلم والتدين اللى بيمثلهم الجامع.

وبيضم الجامع أربع مدارس، كل مدرسة لتدريس مذهب من مذاهب الفقه الأربعة، وهي: الحنفي، والمالكي، والشافعي، والحنبلي، وداخل كل مدرسة هتلاقى مجموعة كبيرة من الغرف علشان سكن الطلاب والمدرسين المغتربين، شوفتوا بقى التخطيط عامل إزاي؟.

وما قصدش التقسيم والعمارة وبس، لأ تعالوا نقول لكم فى خطفة كده التعليم كان إزاى ساعتها وركزوا معانا، كان لكل مذهب شيخ و100 طالب و3 معيدين، وراتب لكل شيخ 300 درهم في الشهر، ولكل معيد 100 درهم، ولطلبة كل مذهب 4250 درهم فى الشهر، تخيلوا كان بيصرف قد إيه على التعليم؟ لأ مش كده وبس ده كمان كان بيصرف لكل طالب وجبة يومية وهدوم تكفيه طوال السنة وكان عامل نظام الرعاية الصحية للطلاب والمدرسين، وفيه طبيب مقيم معاهم علشان لو دارس أو شيخ تعب يعنى ما يلاقيش حد يعالجه ولا إيه، قد إيه الناس دى كانت عبقرية، العبقرية مش فى المكان بس صدقونا العبقرية كمان فى اللى بيصنع المكان.

الجامع في السيدة عائشة بجوار قلعة صلاح الدين الأيوبى، لازم تزوروه في رمضان.. إحساس مختلف خالص للشهر الكريم هناك.