The Definitive Guide to Living in the Capital , Cairo , Egypt

الحلم قرب يتحقق وقريبًا هيتم افتتاح المتحف المصري الكبير اللي منتظرينه بفارغ الصبر علشان يكون إضافة جديدة لحضارتنا المصرية العظيمة، وبما أن التجهيزات بتجري على قدم وساق تم افتتاح الصالة التفاعلية الخاصة بالملك توت عنخ آمون للجمهور وتقدروا تزوروها حاليًا من خلال الحجز، والزيارة هتكون مختلفة ومميزة لأنكم هتتعرفوا أكثر على قصة حياة توت عنخ آمون بشكل جديد ومبهر. تعالوا نتعرف على تفاصيل القاعة وأسعار التذاكر لزيارتها.

القاعة التفاعلية تم تجهيزها بالتعاون مع مؤسسة مدريد آرتيس ديجتالس الإسبانية، وفيها هتلاقوا العرض التفاعلي لحياة الملك توت عنخ آمون اللي نجح في إبهار العالم بمقتنياته اللي دايمًا بتخرج في جولات بره مصر وبتحقق نجاح كبير، ولما تزوروا المتحف هتقدروا تعيشوا حياة الملك الذهبي، وكمان هتستمتعوا برحلة بصرية وسمعية من خلال التكنولوجيا التفاعلية الحديثة لحياة فات عليها 3400 سنة واللي بتتعمل لأول مرة وبتكشف عجائب وأسرار الكنوز الملكية، بداية من أساطير خلق هليوبوليس وحتى كنوز مقبرته الشهيرة.

وكمان هتقدروا تتعرفوا على قصة استكشاف المعابد والكنوز والتعرف على الأسرار من خلال تقنيات الذكاء الاصطناعي، وهتقدروا خلال الجولة اللي بتستمر حوالي ساعتين أنكم تدخلوا في معايشة جديدة للعرض البصري بزاوية 360 درجة ومعاها موسيقى تصويرية مخصصة هتعيشكم جو الرحلة.

القاعة مصممة بشكل حديث بيحصل لأول مرة في العالم وكل قطعة بيكون قدامها شاشة صغيرة بتحكي تاريخها بعدة لغات، والقاعة التفاعلية دي مختلفة تمامًا عن قاعة الملك توت عنخ آمون الرسمية واللي هتضم 500 ألف قطعة أثرية خاصة بعصره.

وعلشان تزوروا القاعة لازم تحجزوا من الموقع الإلكتروني وكمان لازم يكون معاكم إثبات شخصية لما تروحوا، أما بالنسبة لأسعار التذاكر فهتكون للأطفال من 6 حتى 21 سنة بـ150 جنيه للمصري و750 جنيه للأجنبي، ولمن هم أكبر من 21 سنة هيكون سعر التذكرة للمصري 300 جنيه وللأجنبي 1200 جنيه، وتم تحديد سعر 150 جنيه للتذكرة للطلبة المصريين و750 جنيه للطلبة الأجانب، وكمان لكبار السن.

وتقدروا تحجزوا الجولة أو تعرفوا تفاصيل أكثر عن المتحف المصري الكبير من هنا.