The Definitive Guide to Living in the Capital , Cairo , Egypt

الصورة الرئيسية تصوير: عادل بيومي

مدينة “الفيوم” تعتبر واحدة من أقرب المدن للقاهرة، و من المدن اللي صعب تنساها لو زرتها، برغم إنك ممكن تلف على أهم الأماكن السياحية و الطبيعية فيها كلها في يوم واحد، وممكن كمان في 12 ساعة، وده سبب كافي يخليها في أول مخططات الويك إند.

هتروح على فين و تبتدي منين؟ ده أول سؤال هتسأله لنفسك أول ما هتحضر شنطتك و تنطلق على “الفيوم”، و علشان كده جاوبنالك عليه في موضوعنا النهارده، واللي هيضم أكثر الأماكن المميزة اللي ممكن تزورها في 12 ساعة في الفيوم.

التحرك من القاهرة هيكون في حدود الساعة 7 صباحًا، والطريق هياخد منك في حدود ساعة أو ساعة ونص بالكتير.

أول حاجة ممكن تبتدي بيها أول ما توصل هي “محمية وادي الريان” و اللي تعتبر أكتر مكان مشهور و جاذب للسياح، وده بسبب شلالات المياه والجو الجميل اللي حواليها.

المحمية فيها كمان بحيرة ممكن تركب مركب فيها، وأسعاره  مش عالية، وبتكون ما بين 50 و 75 جنيه للساعة الواحدة.

كمان فيه تنوع كبير في الحياة البرية في المحمية وحواليها كمان، يعني ممكن ببساطة تشوف الغزال الأبيض، والغزال المصري، والثعالب، والنسور، وأنواع مختلفة من الطيور المهاجرة.

زيارة المحمية والبحيرة والمركب مش هياخدو منك أكتر من ساعتين.

و على مسافة مش بعيدة من البحيرة (تقريبًا 5 كيلومتر) فيه جبل مشهور جدًا، ومن كتر ما هو ضخم أنت ممكن تلمحه بعينك وأنت واقف في البحيرة، الجبل ده إسمه “المداورة” ، الجبل ده برغم ارتفاعه، إلا إنه سهل جدًا في تسلقه للي حابب يجرب الرياضه دي لأول مرة، ويعتبر مكان ممتاز لمراقبة النسور والطيور المهاجرة من على ارتفاع، المكان ممكن ياخد منك ساعتين كمان ده لو لسه سنة أولى تسلق، أما لو مش حابب تجرب فساعة هتكون كفاية.

“بحيرة قارون” كمان واحدة من أبرز وأشهر منتزهات الفيوم، و معظم سكان الفيوم بيروحوها في الويك إند لأن تقريبًا مفيش حدائق أو منتزهات بالمعنى التقليدي سواء في المحافظة أو في الفيوم نفسها أو المدن القريبة منها.

على شاطئ البحيرة، فيه كافيهات كتير ممكن تقعد فيها قعدة ظريفة وتشرب حاجة، ده غير طبعًا قاعات الحفلات والمناسبات الخاصة اللي بتطل على البحيرة مباشرةً، ويمكن دي أكتر حاجه هتقضي فيها وقت في الفيوم، لإن قاعدة الكافيه مع منظر البحيرة هياخدوك لعالم تاني، مش هترجع منه قبل 3 ساعات.

يمكن أكتر حاجة تضايق في الموضوع إن البحيرة مش مسموح فيها بالسباحة، برغم إن شكل الميه مغري جداً للنزول فيها، لكن ممكن تنزل فيها بطريقة تانيه خالص، و هي إنك تأجر مركب ياخدك جولة في البحيرة، وده كمان هيبقى حاجه حلوة جدًا لو غاوي مراقبة الطيور المهاجرة زي “الفلامنجو”، خصوصًا في الشتاء.

اللي غاوي تاريخ وجيولوجيا وأحافير والذي منه، هيلاقي في “وادي الحيتان” اللي بيدور عليه، لإن ده واحد من الأماكن اللي تحت حماية منظمة اليونسكو باعتباره من أماكن التراث العالمي، وده لإن فيه أول حفريات للحيتان اللي تم اكتشافها في العالم.

في وادي الحيتان فيه أكثر من 400 هيكل لحيوانات مائية، عمرها أكثر من 40 مليون سنة! مش بس كده، كمان في الرمل وبقايا حيوان بحري قديم إسمه “خروف البحر” وهياكل عظمية لأسماك ضخمة.

المحمية مجهزة بممرات خاصة بتمر بين الهياكل والحفريات المختلفة علشان تقدر تشوفها كلها في أماكنها وبشكل مريح، كمان فيه أماكن خاصة للي حابب فكرة التخييم.

محطتنا الأخيرة هتكون “السواقي” ، وده لإن فيه أكتر من 200 ساقية منتشرة في مناطق كتير في الفيوم، وده بيخليك تحس دايمًا إنك مكان ما هتروح هتلاقي الطبيعة وراك، و بالأخص الأربع سواقي الموجودين في وسط البلد، ويمكن أنسب وقت لزيارتهم هو وقت الغروب، لإن المنظر هناك مع الغروب بيكون رائع للي حابب يتصور، و ساعة واحده هتكون وسط السواقي هتكون كفيله بإنها تريح أعصابك وتسترخي علشان تجهز لرحلة العودة للقاهرة اللي تقريبًا هتاخد منك ساعة ونص برده.

و بكده تكون قضيت أجمل 12 ساعة في أجمد ويك إند ممكن تقضيه بره القاهرة.