The Definitive Guide to Living in the Capital , Cairo , Egypt

رغم حداثة نشأته، نجح متحف النسيج المصري في السنوات الأخيرة في إنه يكون مركز ثقافي مهم في القاهرة، وأصبح بالفعل وجهة فنية وثقافية للزائرين المصريين والأجانب، وبمناسبة احتفال المتحف الأيام دي بذكرى مرور 10 سنوات على تأسيسه، هنقولكم في السطور الجاية على معلومات هتخليكم تتعرفوا عليه أكتر.

أول حاجة لازم نكون فخورين بيها كسكان للقاهرة هي إن متحف النسيج المصري هو الأول من نوعه في الشرق الأوسط.

المتحف افتتح لأول مرة يوم 13 فبراير سنة 2010، في مبنى تاريخي شهير هو “سبيل” محمد علي بشارع المُعز بقلب القاهرة الفاطمية.

المتحف بيتكون من دورين فيهم 11 قاعة، بتعرض القطع النسيجية الأكثر ندرة تاريخياً، بداية من العصر المصري القديم مروراً بالعصر الروماني واليوناني، والفن القبطي، وتطور صناعة النسيج في العصور الإسلامية بداية من العصر الأموي ثم العباسي مروراً بالعصر الطولوني والفاطمي والأيوبي والمملوكي والعثماني، ولحد عصر الدولة الحديثة التي بدأت بحكم أسرة محمد علي.

وبحسب تصريحات إعلامية للدكتور أشرف أبو اليزيد مدير عام المتحف، بيمتلك متحف النسيج ثروة كبيرة بتصل إلى أكثر من 1000 قطعة من المنسوجات النادرة اللي بتؤرخ لتاريخ النسيج في عصور مختلفة بتبدأ من العصر الفرعوني ولحد العصر الحديث، وتم تخطيطه بطريقة بسيطة، وبتضم كل غرفة معلومات على الحوائط عن الفترة اللي بتنتمي ليها المنسوجات وتاريخ صنعها، وقصتها التاريخية، وأكتر من نصف القطع دي لسة في المخازن لحد النهارده، وهتتعرض للجمهور قريب.

وبيعتبر شارع المُعز اللي فيه المتحف واحد من أشهر المناطق الأثرية المصرية، وه خلاه أكبر المتاحف المفتوحة للفن الإسلامي في العالم، وبيضم عدد كبير من المباني الأثرية الفريدة اللي اتحول بعضها لمراكز للإبداع الفني والثقافي، منها بيت السحيمي ومجموعة السلطان قلاوون اللي بتضم مسجد ومدرسة وقبة على الطراز الإسلامي المملوكي.

عنوان المتحف: شارع المعز لدين الله الفاطمي، سبيل محمد علي بالنحاسين، الجمالية، محافظة القاهرة.

تليفون: ​٢٧٨٦٥٢٢٧

مواعيد الزيارة: يومياُ من ٩الصبح ولحد الساعة 5 مساءً.

أسعار التذاكر: للمصريين 10 جنيه، للطلاب المصريين 5 جنيه، للأجانب 40 جنيه، للطلاب الأجانب 20 جنيه.