The Definitive Guide to Living in the Capital , Cairo , Egypt

كل يوم بنكتشف حاجات كتير في مصر ويوم عن يوم بننبهر ببلدنا الحلوة، والمرة دي انبهارنا كان مختلف شوية، لأننا كنا منبهرين بمدافن لها تاريخ وقيمة مش هتلقوها في أي حتة تانية في العالم، المرة دي انبهارنا نابع من تحت جبل المقطم وبالتحدير منطقة الأباجية، ومنطقة القرافة الصغرى، وتقدروا تزوروا الأضرحة والمقابر دي في أي وقت وتعرفوا تاريخها المميز للثقافة والمعرفة، وكل اللي عليكم تروحوا منطقة القرافة الصغرى على طريق الأوتوستراد “محطة الأباجية”، وتعرفوا من خلال السطور الي جاية ايه اللي هتزوروه هناك، ومتنسوش أن الحكومة المصرية أعلنت رسميًا أنها هتطور المنطقة دي لتتناسب مع تاريخها.

بعد ما توصلوا القرافة الصغرى، طبقًا لموضوع خاص بالدكتور محمد زهران، هتلاقوا مسجد اسمه الليث بن سعد، هتمشي في الشارع بتاعه لحد ما توصلوا لضريح ذو النون المصري”، وخلوه علي يمينكم وتكملوا مشي، هتلقوا نفسكم بين ضريحين أحدهما لأشهر تائبة على مر العصور السيدة “رابعة العدوية”، أما الضريح الثاني فهو خاص بـ”محمد بن الحنفية” ابن علي بن أبي طالب رضي الله عنهم، بعدها هتكملوا مشي شوية فهتلقوا قبة ضريح الشريفة فاطمة حسن الأنور، وكمان مسجد سيدي عقبة بن عامر الجهني.

بعد ما توصل المسجد هتلقوا ضريح بقبة كبيرة في نص المسجد، وهتكملوا لحد الباب الخلفي للمسجد هتلقوا فيه مربع متر في متر مدهون أخضر على الأرض، ده مدفن عمرو بن العاص رضي الله عنه، أيوة الحقيقة هو مش مدفون في المسجد اللي بإسمه ولكن مدفون في المكان ده، وتم تهميشه أيام الفاطميين ومكنش زي المساجد والأضرحة الثانية نظرًا لخلافات الفاطميين مع عمرو بن العاص، وبعد الفاطميين محدش عمل تجديد أو قبة أو شواهد تنفيذًا لوصية عمرو بن العاص وكمان علشان خوفهم من الشيغة وجبروتهم.

الأساطير بتقول أن الناس العظيمة دي مدفونة هناك علشان عمرو بن العاص سمع من المقوقس وهو بيتمشى معاه أن المقطم فيه شجر من الجنة وأنه مكان طاهر، وأمير المؤمنين عمر بن الخطاب وصى بدفن المسلمين فيه، وكل دول موجودين في القرافة الصغرى.

أما القرافة الكبرى فلها نصيب من الأولياء والصالحين، فهتلقوا فيها أضرحة ومقابر للإمام الشافعي والملك العادل وقايتباي وخلفاء العباسيين والفاطميين والمماليك، ده غير المقريزي واين عطاء الله، والإمام الشاطبي أشهر من جمع قراءات القرآن الكريم.