The Definitive Guide to Living in the Capital , Cairo , Egypt

في الأيام الأخيرة، انتشرت شائعات على وسائل التواصل بتقول إن سيف تمثال سيمون بوليفار بوسط القاهرة اتسرق! لكن طبعًا المنشورات دي غير حقيقية، والحكومة المصرية ردت عليها بشكل رسمي ونفت كل ما جاء فيها. لكن دي فرصة كويسة نعرفكم أكثر على التمثال المهم ده، واللي كثير مننا ممكن يكونوا بيعدوا عليه شكل يومي لكن مايعرفوش حكايته.

بالقرب من مسجد عمر مكرم والسفارة الأمريكية بوسط القاهرة، بيتوسط تمثال سيمون بوليفار الميدان اللي بيحمل اسمه، وهو من أهم التماثيل اللي بتزين قلب القاهرة، وتم تسمية الميدان باسمه، لكن من هو سيمون بوليفار؟

سيمون بوليفار من الشخصيات المهمة في تحرير أمريكا اللاتينية، ورغم انه مات وعنده 47 سنة إلا أن تاريخه النضالي كان كبير، وعلشان كده هنقولكم على 7 معلومات عن تمثال سيمون بوليفار وقصته.

1- ولد سيمون بوليفار في 24 يونيه 1783 وهو مؤسس ورئيس كولوميبا الكبرى، وحرر كثير من الدول من الغزاة.
2- تمثال سيمون بوليفار بيجسد شخصيته في الزي العسكري الكامل وبيظهره التمثال وهو ساند على سيف في إشارة لكبرياءه، وتم نحته عن طريق النحات كارملو تباكو وقاعدته صنعها مانويل بلانكو وهم من دولة فنزويلا.
3- تم وضع التمثال بمكانه الحالي في الستينيات بعهد الرئيس جمال عبد الناصر نظرًا لتقارب الأفكار الثورية بين مصر ودول أمريكا الجنوبية في الوقت ده، وده لتكريم الأفكار المشتركة بينهم.

4- تأثر سيمون بوليفار بحملات نابليون وقرر يحارب الأسبان أسوة بحرب نابليون ضدهم لحد ما نجح في الانتصار عليهم.
5- تم تسمية دولة بوليفيا على اسمه، وتغيير اسم دولة فنزويلا إلى فنزويلا البوليفارية تكريمًا له.
6- التمثال بيزن 500 كيلو من البرونز وطوله 2.3 متر، وبيتوسط الميدان بجوار فندق شيبرد وسميراميس.
7- في عام 2010 تم تجديد وترميم التمثال عن طريق الرئيس الفنزويلي الراحل هوغو شافيز.