The Definitive Guide to Living in the Capital , Cairo , Egypt

صحينا النهارده على خبر مهم جدًا وهيسعد كل عشاق ومحبي الأديب المصري العالمي الراحل “نجيب محفوظ” وهو إن وزارة الثقافة برئاسة الدكتورة “إيناس عبدالدايم” أعلنت عن فتح متحف “نجيب محفوظ” في “تكية أبو الدهب” للجمهور بشكل مجاني لمدة شهر، وده بعد يوم واحد من افتتاح المتحف رسميًا.

ومن المفترض إن سعر التذكرة الرسمية للمتحف هتكون بـ 20 جنيه للسائح الأجنبي، و5 جنيه للمصريين، وهيكون فيه خصم خاص للطلبة.

افتتح متحف “نجيب محفوظ” إمبارح 14 يوليو، الساعة 5 العصر، والافتتاح كان بحضور عدد كبير من المسؤولين والكتاب والأدباء من بينهم الدكتورة “إيناس عبدالدايم” –وزيرة الثقافة- والكاتب “يوسف القعيد” والدكتور “فتحى عبد الوهاب” – رئيس صندوق التنمية الثقافية-  والمهندس “محمد أبو سعدة” – رئيس الجهاز القومى للتنسيق الحضارى-.

المتحف بيعرض مجموعة من متعلقات “نجيب محفوظ” الشخصية بشكل جديد ومختلف، وده بعد ما وجهت الجهات المسؤولة عن المعرض الدعوة لمؤسسات وأفراد علشان يهدوا أي حاجة يمتلكوها من مقتنيات “نجيب محفوظ” لضمها للمعرض، واللي كان منها مقتنيات مكتبة “نجيب محفوظ” الشخصية، واللى اهدتها السيدة “أم كلثوم” بنت نجيب محفوظ للمتحف.

الدور الأول في المتحف بيضم قاعات للندوات، ومكتبة سمع بصرية، ومكتبة عامة، ومكتبة نقدية بتضم أهم الأبحاث والدراسات عن أعمال “نجيب محفوظ”.

أما الدور الثانى فبيضم جناح للأوسمة والشهادات اللى خدها “نجيب محفوظ”، وجناح تاني لمتعلقاته الشخصية، مع بعض الأوراق بخط ايده، وقاعة تالته بتضم جميع أعمال “نجيب محفوظ” بطبعاتها القديمة والجديدة، والأعمال المترجمة، ده غير قاعة للسينما.