The Definitive Guide to Living in the Capital , Cairo , Egypt

في خبر هيسعد الملايين في مصر وحوالين العالم المهتمين بالتاريخ والتراث القبطي، أو حتى المهتمين بالتاريخ الإنساني بشكل عام، والخبر هو إن مصر هتصدر قريبًا جدًا كتالوج بيوثق “رحلة العائلة المقدسة” باللغتين العربية والإنجليزية.

الكتالوج ده هيتضمن توثيق فوتوغرافي وعرض تاريخي لرحلة العائلة المقدسة، وعنوانه “محطات من رحلة العائلة المقدسة” وهيحكي الكتالوج رحلة السيد المسيح وأمه العذراء مريم لمصر، والتعريف بيها، والأماكن التي زارتها العائلة.

البابا تواضروس بابا الإسكندرية وبطريرك الكرازة المرقسية كان وصف الرحلة دي قبل كده بأنها “هدية عظيمة” قدمها ربنا لمصر، وده بعد ما استمرت العائلة المقدسة في مصر 4 سنين، واتنقلت بين 25 مكان في ربوع مصر.

ويعتبر الكتالوج ده خطوة مهمة ضمن خطوات الوزارة علشان توثق محطات مسار رحلة العائلة المقدسة في مصر، تمهيدًا لإعداد ملف شامل بهدف ادراج الرحلة على قائمة التراث العالمي لليونسكو.

وعن تفاصيل الكتالوج، أكد الدكتور “محمد عبد اللطيف” أستاذ الآثار في جامعة المنصورة، ومساعد وزير الآثار السابق، والمشرف على إصدار الكتالوج، بإن الكتالوج هيتضمن توثيق فوتوغرافي للرحلة، وهيكون مبسط وجذاب، وهدفه التعريف بمحطات رحلة العائلة المقدسة في مصر، واللي هي أديرة وادي النطرون وشجرة مريم وكنيسة أبي سرجة وكنيسة العذراء مريم في جبل الطير في المنيا، ودير المحرق في أسيوط، وهيتضمن الكتالوج عرض تاريخي موجز مع خرائط بسيطة بتوضح مسار الرحلة ومحطاتها، زي ما قال لـ “إندبندنت عربية”.

دعم وزارة الآثار للكتالوج علشان يظهر بشكل لائق ومناسب للأهمية التاريخية والدينية للرحلة هيساهم بشكل كبير في التعريف بالرحلة والترويج ليها محلياً وعالمياً، والاستفادة منها على أكتر من مستوى، سواء سياحياً أو اقتصادياً، وخصوصاً بعد زيارة بابا الفاتيكان لمصر السنة اللي فاتت، وافتتاحه لأيقونة العائلة المقدسة، وده خلى “مصر” في موضع اهتمام كبير للمسيحيين الكاثوليك حوالين العالم.

في رحلة العائلة المقدسة، محصلش استقرار في مكان واحد في مصر، إنما اتنقّلت العائلة لأكتر مكان على أرض مصر، من ساحل سيناء إلى دلتا النيل، مرورًا بالصعيد، ودخلت عن طريق صحراء سيناء من جهة العريش والفرما، علشان تعدي على مدن كتير، قسَّمتها مصادر دينية وتاريخية قبطية لثلاث مراحل، الأولى (العريش – الفرما – تل بسطة – مسطرد – بلبيس – مدينة سمنود – سخا – وادي النطرون)، والثانية (المطرية – بابليون بمصر القديمة – منف – المعادي)، والمرحلة الثالثة (البهنسا – جبل الطير – الأشمونين – فيليس – قسقام – مير – جبل قسقام – جبل درنكة)”.