The Definitive Guide to Living in the Capital , Cairo , Egypt

إن يكون لكل واحد فينا حد بيحبه وبيعتز بيه، وممكن كمان ياخده قدوة أو مثل أعلى، فده موجود وطبيعي، لإنه الشخص ده ممكن يكون باباك أو مامتك أو فنان أو لاعب كورة أو صديق.

لكن اللي بيختلف من واحد للتاني دايمًا هوه طريقة تعبير كل شخص فينا عن حبه أو امتنانه للشخص التاني، فممكن تجيبله ورده أو هدية أو تعمله حفلة، أو تصوره صورة.

في حالة “محمد صلاح” اللي ملايين الناس على الكوكب بتعتبره مثل وقدوة وبتحبه لحد الهوس والجنون، بقى صعب جدًا جدًا إنك تلاقي طريقة تعبر بيها عن حبك ليه، بعد الطريقة التقليدية اللي كل الناس تقريبًا بتعملها وهي إنك تلبس التي شيرت بتاعه.

لكن “كيري ماكوسكا” البنوتة الأمريكية اللي بتحب محمد صلاح بشكل غريب، قررت تتجاوز مراحل التعبير عن الحب التقليدية، وقررت إنها تعبر عن حبها لـ “صلاح” خصوصًا بعد إنضمامه لفريقها المفضل “ليفربول” بإنها تلف العالم بتيشيرت محمد صلاح.

“كيري” قالت لـ “CNN” في حوار معاها إن دايمًا الناس كانت بتستغرب للوهلة الأولى، لكن بعدها بتبين رد فعل إيجابي لما يعرفوا إنها بتلف العالم بالتيشيرت، لدرجة إن مصريين كتير سألوها هي لابسة التي شيرت ليه؟؟ لكن كان ردها بعد لفتها للعالم بالتي شيرت، إنها رجعت مصر وهي لابسه تي شيرت “صلاح” بالعربي.

“صلاح راجل عظيم، مش مجرد لاعب كورة” ده كان كلام “كيري” لـ “CNN” لما سألوها إشمعنى صلاح؟

لحسن حظ “كيري” إنها قابلت “صلاح” مرتين، واحده منهم في أمريكا، والتانية كانت في “ليفربول”، والمقبلتين دول كانوا سبب لزيادة حبها لصلاح وقراراها بإنها تعبر له عن حبها ده بطريقة جديدة ومبتكرة، خاصةً بعد ما شافت ابتسامته وحبه لمعجبيه وتواضعه في الوقوف والتصوير معاهم.

ومن الواضح إن “كيري” جمعت بين أكتر حاجتين بتحبهم في الدنيا، “محمد صلاح” و “السفر” وده لإن “كيري” زارت حوالي 60 بلد في 5 سنين بس،وزارت مصر 3 مرات، وكانت بتشتغل “فري لانس – Free lance” بدوام كامل لمدة سنتين عن طريق اللاب توب بتاعها.