The Definitive Guide to Living in the Capital , Cairo , Egypt

كتبت: رحاب نور

القاهرة هي العاصمة بكل ما تحمله الكلمة دي من معني. هي مركز الشغل والشركات الكبيرة والمصالح الحكومية، و في نفس الوقت مركز الأنشطة الفنية والثقافية، والمولات والمحلات والمطاعم وتقريبًا كل حاجة تانية بنعملها في حياتنا. عشان كدة ماحدش فينا يقدر يستغنى عن القاهرة بشكل كامل.. لكن كونها مركز لكل الحاجات دي ممكن يخليها للأسف مركز للزحام والإزعاج ويخلي سكانها عايشين في ضغط عصبي جزء كبير من وقتهم.

كتير مننا مش بيتحملوا الضغط ده وبيبقوا محتاجين يخرجوا منه سواء في أجازة قصيرة أو فترة طويلة شوية ممكن تبقى شهر أو إتنين. و في ناس تانية بيقرروا ينقلوا حياتهم لمكان تاني عشان يعيشوا بشكل أهدى ويبعدوا عن الضغط شوية. خاصة لو شغلهم يسمح بده. ولو أنت بتفكر في الهروب من رتم الحياة السريع والمرهق وعايز تخرج من دوامة الضغط اللي ممكن تسببها حياة العاصمة هتلاقي في السطور دي دليلك للخروج بناء على تجربتنا الشخصية في السفر والحياة خارج القاهرة.

أول حاجة الواحد بيفكر فيها لما يقرر يخرج من مكان هي هيروح فين.. إيه المكان المناسب اللي هيوفرلك اللي أنت محتاجه من هدوء و استرخاء، أو أنشطة وفسح تملى وقتك، واحتياجات حياتك اليومية لو هتقضي فترة طويلة أو هتعيش فيه بشكل كامل. ولو شيلنا من حساباتنا السفر خارج مصر وركزنا على الاختيارات المتاحة جوا بلدنا هنلاقي أماكن كتيرة ومتنوعة جدًا في نوعية الحياة والتجربة اللي هتعيشها فيها.

في المقال ده هنركز على المدن الساحلية لأن الحياة على البحر حلم جميل كتير مننا نفسه يحققه. ولأن موقع مصر على سواحل البحر الأحمر والمتوسط ميزة رائعة بتخلى عندنا اختيارات كتير من المدن الساحلية اللي ممكن نروحها، وكمان بتخلي كل مدينة مختلفة جدًا عن التانية. وإحنا اخترنا خمسة من المدن الساحلية بناء على تجارب شخصية و هنتكلم عن مميزات كل مدينة وعيوبها و نوعية الحياة فيها عشان نساعدك على اختيار المدينة المناسبة ليك وتحقيق الحلم ده.

الغردقة:

هي أكبر مدينة في الناحية الجنوبية من البحر الأحمر، ونقدر نعتبرها مكان مناسب جدًا سواء للأجازات القصيرة أو الطويلة أو لنقل حياتك كلها خارج القاهرة. أهم ميزة في الغردقة هي التنوع والاختلاف بين كل منطقة و التانية. عندك مثلًا الجونة لو أنت بتحب السهر والمطاعم الفخمة وعايز تعيش حياة “على الموضة”. وعندك سهل حشيش لو بتحب الاسترخاء التام والطبيعة الساحرة مع لمسة فخامة ودلع. أما قلب الغردقة نفسه هتلاقي فيه أماكن زي الكوثر ودي فيها بنوك ومحلات وشوارع شبيهة بالتجمع الخامس أو أكتوبر مثلًا بس أهدى وأروق كتير طبعًا. وهتلاقي كمان أماكن شعبية زي  الدهار وده مليان محلات بتبيع كل حاجة وفيه سوق خضار كبير.

الغردقة فيها توازن بين المدينة السياحية والسكنية. بمعنى إن عندك مناطق ومزارات وقرى سياحية كتير، بس كمان في مدارس ومستشفيات كويسة جدًا، ومول كبير نسبيًا، وهايبر ماركت منها سبينيز وكارفور . ده السبب اللي بيخلى الغردقة من أفضل الاختيارات لو عايز تقضي فترة طويلة لأنها بتوفرلك كل احتياجات حياتك اليومية بالإضافة للأنشطة البحرية والسياحية اللي ممن تستمتع بيها.

المشكلة الرئيسية في الغردقة هي المسافة الكبيرة بينها وبين القاهرة. يعني مش هيكون سهل أوي إنك تسافر القاهرة كل شوية لو ليك احتياجات أو مصالح هناك. و الباقي مشاكل بسيطة زي مثلًا إن الشوبنج محدود شوية والماركات المعروفة اللي فاتحة هناك قليلة. لكن لو الحاجات دي مش أساسية بالنسبالك الغردقة هتكون اختيار مثالي.

العين السخنة:

أكبر ميزة في العين السخنة هي قربها من القاهرة. يعني هتكون عايش على البحر وفي نفس الوقت تقدر تروح تعمل شوبنج في التجمع الخامس كل أسبوع لو عايز. وعلى الرغم من إن العين السخنة ممكن ماتعتبرش مدينة بالشكل التقليدي لأنها عبارة عن مجموعة قري سياحية وفنادق على ساحل البحر الأحمر، لكن مؤخرًا بقى فيه اتجاه لبناء مجمعات سكنية بأسلوب الكومباوند هناك ودة خلاها مناسبة أكتر للمعيشة فترات طويلة.

وجود بورتو السخنة كمان بيخلي في مجال أكبر لتعدد الأنشطة ومكان ممكن تخرج فيه غير الشواطئ. وطبعًا تقدر تطلع رحلات بحرية في أي وقت وتستمتع بأنشطة زي الصيد والسنوركلنج. يعني حياتك هناك ممكن تبقى هدوء واسترخاء وفي نفس الوقت فيها لمسة مدنية ومظاهر كتير من العيشة المودرن.

الحياة في العين السخنة مناسبة جدًا للشباب أو لاتنين متجوزين جديد و كمان للناس الأكبر سنًا. لكن لو أنت عندك أطفال محتاجين مدارس أو لو حياتك اليومية بتخليك تروح مشاوير لبنوك أو مصالح وشركات بشكل متكرر الحياة في السخنة أو قضاء وقت طويل فيها هيكون صعب شوية لأنها لسة مش موجود فيها الحاجات دي.

دهب:

لو عايز تبعد تمامًا عن حياة المدن الكبيرة وتعيش أنت والبحر وبس، دهب هتكون المكان المناسب ليك. تجربة دهب أساسها هو الاتصال المباشر مع الطبيعة والحياة البسيطة بدون أي إضافات. أجازة طويلة في دهب ممكن تكون الحل المثالي لتهدئة أعصابك وتحسين نفسيتك بعيد عن أي إزعاج وتوتر. لكن لو بتفكر تعيش هناك فترة لازم تحط في حساباتك الحاجات اللي مش هتكون موجودة زي المولات والمحلات الكبيرة. و لازم تعرف إن الاختيارات هتكون محدودة في المستشفيات والمدارس ووسائل المواصلات. ده طبعًا غير مشكلة المسافة الطويلة جداً بينها وبين القاهرة.

أهم مميزات دهب هي المزارات الطبيعية الرائعة زي البلو-هول و ثري بولز والوديان والجبال الساحرة فعلًا. الأماكن الطبيعية دي بتديك فرصة إنك تعمل أنشطة ممتعة جدًا زي الغطس والسفاري والرحلات البحرية. والحاجات اللي هتشوفها هناك مش موجودة في أي مكان تاني. كمان فيه اختيارات لطيفة في المطاعم خاصة في المأكولات البحرية.

حياتك في دهب هتكون جميلة لو أنت من عشاق الطبيعة والهدوء والبساطة الشديدة. ولو عندك استعداد تستغني عن معظم مظاهر الحياة المدنية اللي اتعودنا عليها في مقابل حياة هادية ونقية يبقى دهب هي الاختيار المناسب.

شرم الشيخ:

مدينة سياحية جداً، بمعنى إن كلها اتبنت بهدف السياحة والاستمتاع. هتلاقي هناك طبيعة ساحرة من بحر وشواطئ وصحراء. وهتلاقي فسح ومطاعم وسهر وكل الحاجات اللي ممكن تقضي فيها وقت حلو. لكن ده بيخلي الحياة هناك أغلى شوية من العادي لو أنت عايز تستمتع وتعيش في مستوى فوق المتوسط.

وطبعًا مش محتاجين نتكلم عن روعة خليج نعمة أو محمية رأس محمد عشان نقنعك إن شرم الشيخ جميلة. الأنشطة اللي ممكن تعملها هناك متنوعة جدًا بين الأنشطة البحرية وبين السفاري وكمان التمشية في المدينة نفسها ممتعة. يعني أيامك ممكن تتنوع بين أنشطة كتير ومش هتزهق بسرعة.

ميزان شرم الشيخ بيميل ناحية السياحة أكتر من الحياة اليومية العادية. يعني هتحس إنك دايماً بتتفسح، لكن ممكن تفتقد إحساس المدينة السكنية المريحة شوية. ده مش معناه إنك مش هتلاقي مدارس ومستشفيات كويسة هناك لكن الإختيارات مش كتير لأنها مدينة صغيرة. ولو أنت هدفك إنك تعيش حياة أساسها الفسح والمتعة شرم الشيخ هي مدينتك.

مرسى مطروح:

تعتبر هي الوسط بين الحياة البسيطة مع الطبيعة وبين الحياة المدنية بمميزاتها. المدينة دي فيها أماكن هادية ورايقة جدًا زي المنطقة اللي حوالين شاطئ الأبيض وعجيبة ودول مش هتلاقي فيهم غير فيلات ومباني متفرقة وتقدر هناك تستمتع بالعيشة وسط الرمال والبحر بس. وكمان فيه أسواق ومناطق حية جدًا زي شارع إسكندرية ومنطقة البوسيت اللي مليانين محلات وناس رايحة جاية.

المزارات الطبيعية في مرسي مطروح زي حمام كليوباترا وشاطئ الغرام لطيفة جداً، وشاطئ عجيبة فعلًا مبهر على الرغم من شوية زحمة وإهمال أحيانًا.  الأماكن دي هتكون فسح لطيفة تقدر تروحها كل فترة علشان تكسر الروتين. وبالنسبة للمطاعم هتلاقي هناك مطاعم ظريفة للمأكولات البحرية والمشويات والأكلات الشعبية لكن المطاعم الفخمة مش موجودة هناك كتير.

مرسى مطروح مدينة هادية وجميلة، والحياة هناك ممكن تكون رايقة جدًا. لكن لازم يكون في حساباتك إن الاختيارات في المدارس والمستشفيات برضه محدودة ومش هتلاقي هناك محلات ماركات أو مولات كبيرة. لو الحاجات دي مش أساسية عندك وبتدور على مدينة صغيرة لطيفة هتلاقي هناك اللي أنت محتاجه.

وأخيرًا..

الكلام اللي قلناه ممكن يكون بداية تشجعك إنك تفكر في الخروج من الضغط ورتم الحياة المرهق، وممكن تبتدي تحدد من خلاله  أنهي مدينة مناسبة ليك أكتر. لكن نصيحتنا ليك هي إنك قبل ما تاخد قرار لازم تجرب تروح المدينة تقضي فيها فترة وتشوفها على الطبيعة عشان تحكم بنفسك.

مع تمنياتنا بهروب سعيد وأوقات ممتعة!