The Definitive Guide to Living in the Capital , Cairo , Egypt

الصورة الرئيسية: Vlad Kiselov

بمناسبة ذكرى تحرير سيناء، تعالَ نعيش مع بعض تجربة من نوع خاص، بعيد عن دوشة القاهرة وزحمتها، ونغوص في سحر شمال سينا، وبالذات مدينة العريش اللي جمالها بيخطف القلب قبل العين.

لو بتسأل توصل إزاي، فالموضوع أبسط مما تتخيل. تقدر تركب من موقف المرج الجديد في القاهرة أو من موقف الإسماعيلية، وكمان في سواقين بيرتبوا رحلات خاصة للعريش، تلاقيهم بسهولة على جروبات السفر على الفيسبوك. وساعتها الرحلة نفسها هتبقى جزء من المتعة.

أول ما توصل العريش، هتلاقي قدامك اختيارات كتير للإقامة تناسب كل الأذواق والميزانيات. من فنادق شعبية قريبة من البحر، لشاليهات في أماكن زي المساعيد والريسة، لحد شقق للإيجار بأسعار معقولة تبدأ من 300 جنيه في الليلة. يعني مهما كانت ميزانيتك، أكيد هتلاقي مكان يريحك.

وأجمل حاجة بقى في العريش.. شواطئها! 

مافيش أحلى من قعدة على رملة المساعيد تحت عرائش جريد النخل، أو يوم هادي على شاطئ ظلال النخيل لو بتحب الهدوء والهروب من الزحمة. ولو عاوز تحس بنبض المدينة، تروح على شاطئ وسط البلد، اللي مليان كافيهات ومطاعم وقعدات بدوية على البحر. أما لو نفسك في صيد السمك والاستمتاع بجو نظيف ومنعش، شاطئ أبو صقل هيكون اختيارك المثالي. أما لو انت من الناس اللي بتحب المغامرة والطبيعة الصافية، شاطئ الريسة مستنيك بقعدة تحت النخيل وشاي عالجمر ومشاهدة عربيات بتتسابق وسط التلال الرملية.

جوا العريش كمان، متفوتش الفرصة وتلف شوية وسط تراث المدينة. زور سوق الخميس القديم، تفرج على المحلات والبيوت الطينية، وعيش لحظات بسيطة كلها دفء. وكمان لو بتحب التاريخ، هتلاقي بقايا قلعة العريش والمساجد القديمة اللي بتحكي حكايات الزمن الجميل.

ومتنساش تتسوق وأنت هناك! 

العريش ليها طابع خاص بالليل، سوق السمك هيخليك تجرب أحلى وأطعم سمك فريش، وكمان تقدر تشتري لبس عربي تراثي، مشغولات يدوية، وزيوت ونباتات طبيعية هتبهرك بجودتها.

ولو لسه عندك طاقة تكتشف أكثر، خدلك يوم تزور فيه مدينة الشيخ زويد، تتجول وسط مزارع الزيتون والخضار والفواكه، وتشوف بإيديك إزاي أهل سينا حولوا الرمال لأرض خضراء بتفرح القلب. وكمان تروح على بئر العبد وتستمتع ببحيرة البردويل، هناك السمك طازة من البحر على المائدة على طول.

المحافظة هناك عاملة شغل جامد علشان تضمنلك صيف مريح وآمن. من تنظيف الشواطئ، وتجهيز الكورنيش وإنارته، لتوزيع فرق إنقاذ، وضخ المياه العذبة كل يوم، وكمان تنسيق كامل بين الجهات علشان كل حاجة تبقى منظمة ومافيش أي حاجة تعكر عليك يومك. حتى الكافيهات اللي عالكورنيش متقسمة بنظام، علشان تلاقي مكان تقعد فيه من غير دوشة أو زحمة.

العريش مش بس بحر ورمل.. العريش حالة حب وسحر وطبيعة مفيش زيها.

جهز شنطتك، وحط العريش في خطتك الصيفية.. واستعد تعيش أجمل أيام عمرك وسط أحلى ناس وجمال رباني خلاب.