The Definitive Guide to Living in the Capital , Cairo , Egypt

المتحف الزراعي في الدقي كان الغرض من إنشائه هو التوثيق لذاكرة مصر الزراعية، وأنه يكون نافذة تطل منها كل الأجيال المصرية علي حضارة مصر الزراعية، ده غير أنه مركز للثقافة الزراعية.

المتحف أقيم في سراي الأميرة فاطمة إسماعيل ابنة الخديوي إسماعيل في حي الدقي، وبدأ العمل عليه عام 1930 بعد ما صدر قرار بإنشائه من مجلس الوزراء المصري في 21 نوفمبر من عام 1927.

كان اسمه في البداية “متحف فؤاد الأول الزراعي” لكن بعد كده أصبح اسمه المتحف الزراعي المصري، وممكن اعتبار المتحف ده أكتر من مجرد متحف واحد، لانه بيحوي متاحف كتيرة ومختلفة، منها متحف المجموعات العلمية، ومتحف البهو العربي السوري، ومتحف الصداقة المصرية الصينية، ومتاحف تانية.

مساحة المتحف أكتر من ثلاثين فدان، أي ما يعادل 175 ألف متر مربع، وبيعتبر أول متحف زراعي في العالم كله. وثاني أهم مكان متخصص في الزراعة على مستوى العالم بعد المتحف الزراعى في العاصمة المجرية بودابست.

المتحف بيضم آلاف المعروضات والمقتنيات اللي بتقدم في مجملها قراءة تاريخية للزراعة وتطورها في مصر من عصر الفراعنة، ويمثل المتحف قبلة للعلماء والباحثين في مجال الأبحاث والدراسات الزراعية والبيطرية والتاريخية.

المتحف فيه مقتنيات ونباتات نادرة بعضها انقرض من الوجود، زي نبات (البرساء) اللي كان مقدس عند الفراعنة، وفيه كمان نماذج لآلات زراعية تاريخية زي المجرش أو آلة طحن الحبوب، اللي بيعود تاريخها إلي 15 ألف سنة، ده غير الصور الفوتوغرافية والأعمال الفنية الزيتية اللي بترجعك لأجواء الماضي، وتطور الأساليب الزراعية عند الفلاح المصري، وأشكال الحياة القروية عبر التاريخ.

سعر دخول المتحف عمومًا من البوابة: 3 جنيه للمصرى شامله دخول الآتي:

متحف المجموعات العلمية / متحف البهو العربى السورى / ومتحف الصداقة المصرية الصينية / متحف الثروة والمجموعات النباتية.

متحف الزراعة المصرية القديمة: وده له تذكرة منفصلة قيمتها 3 جنيه للمصري

متحف المقتنيات التراثية: وسعر تذكرته 3 جنيه للمصري.