The Definitive Guide to Living in the Capital , Cairo , Egypt

في أكتوبر 2024 بتحل الذكرى الـ51 لنصر أكتوبر العظيم، اللي فيه انتصر الجيش المصري على العدو في ملحمة عسكرية تاريخية، وعلشان نحتفل بنصر أكتوبر المجيد، مافيش أفضل من زيارة المتاحف الحربية الموجودة في القاهرة، واللي بتحكي تاريخ وبطولات الجيش المصري العظيم، وعلشان كده هنعرفكم على 3 متاحف تقدروا تزوروها في اليوم ده، خاصةً وأنها مناسبة لكل الأعمار وهتعرفكم أكثر عن تاريخ الجيش المصري.

بانوراما حرب أكتوبر

فكرة تأسيس بانوراما حرب أكتوبر كانت عام 1983 وتم بناءها على مساحة 31 ألف متر وافتتحت ضمن احتفالات نصر أكتوبر عام 1989، وبتضم منصتين للعرض المكشوف؛ واحدة للأسلحة اللي كانت ملك للجنود المصريين والثانية لأسلحة تم مصادرتها من العدو.

وداخل بانوراما حرب أكتوبر مبنى اسطواني بقطر 44 متر وارتفاع 27 متر، وبيعلوه برج من الحديد والنحاس بارتفاع 10.5 متر، وبها أكثر من قاعة عرض؛ القاعة الدائرية، وقاعة 1 فيها أعمال القوات المسلحة من عام 67 حتى عام 73، وقاعة 2 ودي بتجسد ملحمة العبور، وقاعة 3 فيها أعمال الأفرع الرئيسية للجيش المصري خلال حرب أكتوبر 1973، وقاعة 4 بتضم مكتبة تاريخية مزودة بقاعة للإطلاع، وكل قاعة من دول بتشيل لحد 50 فرد.

بانوراما حرب أكتوبر بتشتغل طوال أيام الأسبوع ما عدا الثلاثاء، وفيه حفلات صباحية الساعة “9:30 – 11:00 – 12:30″، وحفلتين مسائية “6:00 – 7:30″، والعروض هناك بتكون باللغات “العربية – الإنجليزية – الفرنسية – الألمانية – الإيطالية – اليابانية – الصينية – العبرية”، وبيتوفر داخل البانوراما كافيه ومحل هدايا وستديو تصوير فوري.

العنوان: طريق النصر – صلاح سالم.

رقم التليفون: 0224028862 – 0224022317

 المتحف الحربي

من المعروف أن المتحف الحربي موجود داخل القلعة على طريق صلاح سالم، لكن اللي كتير مايعرفهوش أن المقر الأساسي للمتحف الحربي كان في شارع الفلكي وتم بناءه عام 1937 والمكان ده وقتها كان مقر وزارة الدفاع، وسنة 1938 اتنقل المتحف لمنطقة جاردن سيتي، قبل ما يتنقل عام 1949 لمنطقة قصور الحرم في القلعة وهو المقر الحالي، وهتلاقوا فيه قواعد بتحكي فترات مهمة في تاريخ مصر، وكل مرحلة لها اسمها زي المجد، والملابس، والمدفعية، والأسلحة، نصر أكتوبر 1973، الشهداء، العصر الفرعوني، العصر الإسلامي، عصر أسرة محمد علي باشا، وقاعات 48/52/56/67.

المتحف الحربي مفتوح يوميًا من 8 صباحًا حتى 6 مساءً، وبيقدم شرح وافي باللغتين العربية والإنجليزية لكل محتوياته، وفيه كافيتريا وستديو تصوير فوري ومحل هدايا وبرجولة للموسيقى العسكرية.

العنوان: قلعة صلاح الدين – السيدة عائشة.

رقم التليفون: 0225129619 – 0225116218 –  0225110955

متحف القوات الجوية

من أجمل المتاحف الحربية في مصر، وهتلاقوا فيه معرض للطائرات الحربية الحقيقية وكل طائرة لها حكاية وقصة هتعرفوها، وهتشوفوا عرض تقديمي متكامل لتعليم الطلاب علوم الطيران، وداخل المبنى الرئيسي لمتحف القوات الجمية هتلقوا سينما وجداريات ومكتبة وصور ووثائق وجداريات نادرة بتحكي تاريخ القوات الجوية منذ انشاءها عام 1932.

وخلال جولتكم في متحف القوات الجوية ماتنسوش تزوروا أهم مكان جواه وهو قاعة الطائرة، وقاعة 9D، ومحكى الطائرة F16. المتحف مفتوح يوميًا ماعدا الثلاثاء من 9 صباحًا حتى  3 عصرًا، وبيكون فيه جولة داخلية بصحبة مرشد من المتحف بتبدأ الساعة 10 وكل ساعة بيبقى فيه فوج جديد حتى 3 عصرًا، والدخول بيكون من بوابة صلاح سالم، وفيه جراج للسيارات بقيمة 5 جنيه للسيارة.

العنوان: قاعدة ألماظة الجوية – شارع صلاح سالم – أمام الكلية الحربية.

رقم التليفون: ٠١٠٢٤٠٢٨٢٧٠ –  ٠١٠٦٠٨٢١٨٦٠