حكاية مسجد “الصالح طلائع” التاريخي بالقاهرة
المسجد المعلق باب زويلة مساجد القاهرة الفاطمية مساجد القاهرة القديمة مساجد تاريخية مسجد الصالح طلائع
Mohamed Talaat
القاهرة واحدة من أهم عواصم العالم اللي فيها مباني تاريخية عظيمة، والمساجد جزء مهم من المباني دي، وفي الموضوع ده هنعرفكم على حكاية وتاريخ مسجد “الصالح طلائع” بالقاهرة، واللي بيعتبر آخر الجوامع اللي اتبنت في العصر الفاطمي.
مسجد “الصالح طلائع” له اسم تاني معروف بيه، وهو الجامع المعلق، والسبب إن مستواه عالي مقارنة بالشارع اللي أمامه بحوالي 4 متر، وتحته فيه مجموعة محلات وظيفتها هي توفير المتطلبات المالية للمسجد.
المسجد التاريخي ده تم بناؤه سنة 555 هجرية، الموافق سنة 1160م، بأمر من الوزير “الصالح طلائع بن رزيك”، اللي كان وزير للخليفة الفاطمي الفائز وبعده الخليفة العاضد.
المسجد موجود في ميدان بوابة المتولي في منطقة باب زويلة.
بيعتبر مسجد “الصالح طلائع” من المساجد الضخمة في القاهرة من حيث المساحة، وبتوصل مساحته لحوالي 1522 م2، وله 4 واجهات، وموجود تحت ثلاثة من الواجهات دي متاجر كانت وظيفتها زي ما قولنا توفير المتطلبات المالية للمسجد.
المسجد مبني بالحجر، زي أغلب المنشآت الفاطمية في مصر، ومنها سور القاهرة القديم بأبوابه المشهورة الفتوح والنصر وزويلة، والجامع الأزهر، ومسجد الحاكم بأمر الله، وغيرها من المباني العظيمة.
بيتميز مسجد “الصالح طلائع” بثراء زخارفه وتنوعها ودقتها، سواء في مسطحاته الداخلية أو الخارجية، وبتمتاز الزخارف دي بدقة وجمال وروعة منظرها وعناصرها الهندسية الدقيقة، والمسجد بيتميز كمان بوجود كتابات قرآنية مكتوبة بدرجة عالية من الفن والموهبة.
وكان في الماضي موجود في أعلى المسجد مئذنة بتعلو الباب الغربي الرئيسي، لكن للأسف تم هدمها، واتبنى مكانها واحدة تانية بعد كدة، لكن تم هدمها هي كمان سنة 1926م لخلل في بنائها، ومن يومها والمسجد بدون مئذنة.
