The Definitive Guide to Living in the Capital , Cairo , Egypt

يمنى أحمد

مصدر الصور هنا.

القاهرة مليانة حاجات مدهشة فعلًا، لكن فيه حاجات من كتر عظمتها بنندهش بيها كل مرة نعرف عنها حاجة جديدة، منها الجامع الأزهر اللي بيحتفل الفترة دي بعيد ميلاده الـ 1083 سنة!

جامع الأزهر الشريف مش بس يعتبر من أقدم مساجد العالم لكنه قبلة العلم في القاهرة ومقصد كتير من الطلاب من جميع أنحاء العالم. أنشأه جوهر الصقلي سنة 361 هـ/972م.

لما تدخل الجامع الأزهر هتحس بونس غريب حتى لو مش أول مرة تدخله، والونس ده هيتكرر في كل مرة هتبص فيها على النقوش اللي في أسقفه وجدرانه، فيه حضارات كاملة مختصرة في الجامع ده، وكل رواق فيه مميز بأكتر من حاجة وحتى الناس اللي فيه هتحسهم تابعين للعصر ده بس بشكل حديث.

الجامع مش بس للصلاة ولا لدروس العلم التقليدية، لكنه فيه دورات مكثفة عن العلوم الشرعية بالمذاهب المختلفة والعلوم العربية بكافة أشكالها، تقدر تشترك في أي دورة فيهم على مدار السنة أو أي مدة حاببها، ده غير دورات حفظ القرآن وتعلمه ودراسة أحكامه وتفاسيره.

يمكن كمان من أكتر الحاجات اللي بتميز الأزهر إن هناك طلاب وافدين من جميع أنحاء العالم دايمًا موجودين، ولما تتكلم معاهم هيحكوا لك قد إيه إنهم شايفين مصر دي عظيمة بسبب الأزهر، وإن حياتهم كلها اتغيرت لما عاشوا بس في القاهرة!

خلينا نختم لك السطور دي بأن الأزهر عامل إفطار يومي بأكتر من 4000 وجبة للوافدين والصائمين كمان الموجودين في المسجد، وصلاة التراويح هناك حاشدة حرفيًا. خليك مبسوط وفخور إن في بلدك الجامع الأزهر.