The Definitive Guide to Living in the Capital , Cairo , Egypt

“تجربة سلبية”…. بالكلمتين دول وصف بعض السياح تجربتهم لزيارة منطقة أهرامات الجيزة، للأسف السياح قالوا كمان إن السبب في ده إنهم بيتعرضوا لمعاملة مش ظريفة من بعض اللي شغالين في المنطقة، ده غير كمان انعدام الخدمات البسيطة والأساسية زي وجود حمامات نظيفة مثلًا، أو مطاعم تقدم لهم خدمة كويسة، ده كله غير إنهم أحيانًا بيتعرضوا لعمليات نصب من الأشخاص اللي بيأجروا لهم الجمال والأحصنة (الجمالة)  علشان يلفوا بيها في الصحراء المحيطة بالمنطقة.

لكن ناس كتير سواء مصريين أو سياح أجانب أو عرب، حلمهم إن الأوضاع دي تتغير في الفترة اللي جاية، وخصوصًا بعد ما قالت وزارة الآثار المصرية إنها تعاقدت مع شركة “أوراسكوم للاستثمار القابضة” اللي صاحبها رجل الأعمال “نجيب ساويرس”، واللي بناءً عليه الشركة هتبقى هي المسؤولة عن كافة الخدمات في منطقة الأهرامات، وهتحولها لمنطقة سياحية تسيب أثر إيجابي عند الزوار والسياح، وفيه كلام إن ده كله هيكون خلال سنة واحدة بس، يعني على 2020 المشروع الكبير ده هيكون حقيقة مش حلم.

الموضوع ده جه بعد أسبوع تقريبًا من حادثة تسلل سائح دنماركي لمنطقة الأهرامات، وطلع فوق هرم “خوفو” وسجل فيديو مش ظريف.

الحكومة المصرية قالت إن التعاقد مع “أوراسكوم” مش قرار مفاجئ، لإن اللي ناس كتير ما تعرفهوش إن المفاوضات بين الشركة والحكومة إستمرت لأكثر من سنة.

نيجي بقى للسؤال المهم! إيه اللي هيحصل في المنطقة؟ وإيه الخدمات اللي هتتقدم؟ بص يا سيدي، الخدمات اللي اتفقت عليها وزارة الآثار مع شركة “أوراسكوم” كانت كالآتي، أولًا التسويق والترويج للمنطقة، وتشغيل ساحة انتظار الباصات السياحية اللي موجودة بره المنطقة الأثرية، وقدام المدخل الجديد اللي على طريق الفيوم، وطبعًا هيبقى ممنوع دخول أي عربيات أو أتوبيسات جوه المنطقة، وبالتالي الشركة هتوفر وسائل نقل للسياح والزائرين لجوه المنطقة، وهتبتدي بـ 30 أتوبيس و20 عربية بالكهرباء وصديقة للبيئة، علشان نحافظ على المنطقة .

ثانيًا بقى وركز معايا، مدخل الفيوم الجديد لمنطقة الاهرامات واللي فيه مركز استقبال جديد للزوار والسياح، هتكون شركة “أوراسكوم” كمان مسؤولة عن تشغيله وصيانة الخدمات اللي هتتقدم فيه، واللي هتكون عبارة عن مجموعة من المحلات والمطاعم وقاعات عرض سينما لأفلام محددة هيشرف عليها المجلس الأعلى للآثار.

ثالثًا، الشركة هتبني 20 حمام متنقل في المكان، ده غير مركز طبي متنقل كمان للزوار، وطبعًا شوية مطاعم للوجبات السريعة (Fast Food) والكافيهات اللي هتكون في الأماكن اللي هيحددها ويوافق عليها المجلس الأعلى للآثار علشان ما تشوهش منظر المكان.

رابعًا، ياسيدي “أوراسكوم” هتستغل الفيو الرائع و البانورامي للمنطقة، وهتنظم فيها مجموعة كبيرة من الحفلات والأنشطة الفنية والثقافية التانية علشان تطلع بصورة مشرفة ومعبرة كمان عن تاريخنا، مع توفير طبعًا خدمات الإنترنت ( Wi-Fi)، وخدمات ديجيتال تانية زي “دليل الزوار” أو “المرشد الإلكتروني” وكمان أبلكيشنز أو برامج للتليفونات نقدر من خلالها نتعرف أكتر على الخدمات اللي موجودة في المكان، ده غير طباعة وتوزيع خرائط إرشادية للزوار، وتقديم خدمات مميزة لكبار الزوار (VIP)، وأكشاك تصوير ورسم.

آخر وأهم حاجة الحقيقة وهي “النظافة والشكل العام” ، ولإن المحافظة على نظافة مكان زي ده شئ مهم جدًا، “أوراسكوم” اتفقت مع شركات نظافة خاصة، هتقوم بالمهمة دي، ده بالإضافة لشركة تأمين لأماكن خدمات الزوار، مع وجود وزارة الداخلية، وأمن المجلس الأعلى للآثار لتأمين المنطقة بشكل عام، والزائرين والمنطقة الأثرية والآثار بشكل خاص.

أجمل حاجة في الموضوع بقى هو إن عقد شركة “أوراسكوم” مع المجلس الأعلى للآثار فيه شرط تدريب الشركة لأصحاب الحرف والخيالة، وأصحاب الجمال، والبياعين والمصورين وأصحاب عربيات الخيل الموجودين حالياً في المنطقة الأثرية، وده علشان ترفع كفاءة تعاملهم مع السياح، ده غير إنها هتوفر لهم زي خاص بيهم جوه المنطقة الأثرية، وفي الأماكن المخصصة ليهم.