The Definitive Guide to Living in the Capital , Cairo , Egypt

شركات السفر كتير في القاهرة، لكن “شنطة سفر” شركة مختلفة في فكرتها ومحتواها، والسبب إنها بتعمل رحلات لأماكن غير تقليدية في مصر، وتقدروا من خلالها تكتشفوا المجهول في بلدنا من آثار وأماكن خلابة ومميزة، وهدفهم تعريف المصريين بأجمل الأماكن المنسية داخل الوطن من خلال السياحة الداخلية.

الشركة تم تأسيسها عن طريق 3 أصدقاء، ماجد الشريف، وبيشتغل ممثل، وأحمد يحيي وهو مرشد سياحي متخصص في التاريخ، ومحمد مصطفى اللي بيشتغل صحفي، وجت لهم الفكرة من خلال رحلاتهم الكتير، واللي فيها اكتشفوا جمال مصر والأماكن اللي مش معروفة للناس، ومن هنا قرروا يعملوا رحلات فريدة من نوعها، وبسعر مناسب.

بدأت شركة شنطة سفر نشاطها وأخدت مقر وعملوا صفحة على الفيسبوك، وأول رحلة عملوها للصعيد كانت لمحافظة المنيا اللي ملقبة بعروس الصعيد، والرحلة كانت 3 أيام كلهم زيارات وأنشطة مميزة ومختلفة.

الشركة بتعمل رحلات لأهم المحافظات المصرية، وعملوا رحلات للفيوم وبني سويف وسوهاج والأقصر، ومانسيوش سيناء في رحلاتهم، وإسكندرية كمان، وبيعملوا رحلات داخل القاهرة وأماكن قريبة منها، وحاليًا بيجهزوا رحلة لواحة سيوة، هتكون 5 أيام، وهتتضمن زيارة القلعه ومعبد آمون وبحيرات الملح وأكثر.

تقدروا تعرفوا أكثر عن شنطة سفر ورحلاتهم من صفحتهم على فيسبوك من هنا