The Definitive Guide to Living in the Capital , Cairo , Egypt

الصورة الرئيسية: Simon Berger

الاستمتاع بشم النسيم له أكتر من طريقة ومكان، وكل مجموعة بتحب تقضيه بشكل مختلف ومميز، ومن أهم طرق الاستمتاع بعيد شم النسيم أننا نروح لمكان فيه بحر ونستمتع بالجو والشمس ونغير الحالة النفسية، ومن السهل جدًا تسافروا كل المدن الساحلية من القاهرة من خلال وسائل المواصلات المتعددة سواء شركات نقل خاصة أو أتوبيسات عامة وحتى القطارات في خدمتكم، لكن طبعًا يفضل بعربية خاصة لو متاح، ولأننا في كايرو 360 بنحب البحر وجو شم النسيم البديع، هنعرفكم على 5 مدن ساحلية تقدروا تروحوا لهم كرحلة يوم واحد أو أكتر  في عيد شم النسيم.

العين السخنة

هتلاقوا فيها كل اللي محتاجينه وفيها ألعاب وشواطئ وفسحة وشُعب مرجانية وسفاري وخضرة وغطس وحفلات وتلفريك وركوب أمواج وكل حاجة نفسكم فيها، وهي تعتبر أقرب مدينة ساحلية للقاهرة والوجهة الأولى لرحلات اليوم الواحد.

الإسكندرية

الروح اللي موجودة في الإسكندرية مش موجودة في أي مكان تاني، وبيطلق عليها “مدينة الرب”، وتقدروا في الإسكندرية تأجروا لنش وسط البحر أو تنزلوا المياه في الشواطئ العامة والخاصة وكمان فيه بيتش باجي وموتوسيكلات في بعض الشواطئ، ده غير قلعة قايتباي اللي هتشوفوا منها بحر الإسكندرية المميز وتشموا “اليوود” اللي هيغير مودكم تمامًا.

الإسماعيلية

رغم أن المدينة صغيرة إلا أنها ممتعة وفيها حلاوة مش موجودة في كتير من المدن، وتصميمات منازلها هتبهركم ورغم أن الشواطئ عندهم مش كتير ولكن بالتأكيد هتلاقوا اللي يناسبكم، ومن الأنشطة المميزة عندهم الغطس والصيد وركوب الأمواج، ومتنسوش زيارة بحيرة التمساح ومنزل ديليسيبس ومتحف قناة السويس، وماتنسوش تأكلوا سمك.

بورسعيد

جنة مصر اللي بتجمع بين قارتي آسيا وأفريقيا، وخلينا نقول لكم إن أهم حاجة في بورسعيد أنكم تستمعوا بطيور النورس والفلامنجو وأنتم بتعدوا بالمعدية لمدينة بورفؤاد اللي هتبهركم بجمالها، وكمان تقدروا تعملوا شوبينج بما أنها سوق حرة وحقيقي هتأكلوا شوية سمك مميزين، وماتنسوش تزوروا شواطئها اللي لسه بجمالها، وكمان تزوروا المعالم السياحية المهمة فيها واللي أهمها متحف بورسعيد الحربي والفنار ومقابر الكومنولث وبحيرة المنزلة ومحمية أشتوم.

السويس

من المدن المميزة اللي لسة محتفظة بجمال شواطئها والمياه الصافية، ومن أشهر الشوطئ فيها “ستيلا ماري”، و “الأرض الطيبة”، وهناك تقدروا تأكلوا سمك مميز وهو لسه طازة، وماتنسوش أن مدينة السويس موجودة وسط موقع طبيعي خلاب بيحيطها الجبال مع البحر، وبالمناسبة تقدروا تزوروا سلسلة جبال عتاقة وآثار جنيفة والجزيرة الخضراء وغيرهم.