The Definitive Guide to Living in the Capital , Cairo , Egypt

أهلًا بالعيد، والعيد يعني تجمع الأهل والأصحاب والحبايب، للفرحة والاستمتاع والأنتخة، فمافيش مانع أبدًا من أنك تهرب من زحمة القاهرة وتسافر لمدة يوم وترجع تاني، يعني هتروح وترجع في نفس اليوم.

الفيوم

الطبيعة الساحرة هناك قادرة إنها تنسيك أي ضغط مريت بيه، بمجرد ما تحجز في أي فندق هناك داي يوز، هتستمتع بيومك من أوله لأخره.

أنسب مكان ممكن تروحه في الفيوم هو قرية تونس واللي معروفة بنشاط صناعة الفخار واللي ممكن تتعلمه في اليوم ده أو خلي ولادك يستمتعوا بيه. ده غير نشاط مراقبة الطيور الصبح أو قبل المغرب، أو أنك تركب حصان أو تركب مركب في بحيرة قاروون. لكن لو حاسس بالنشاط وعاوز تعمل حاجة مختلفة ممكن تروح عند الماجيك ليك وووادي الريان وتتزحلق على الرمال وبعد كده تتفرج على الشلالات، اللي وسط الجبال أو تتفرج على الطبيعة الجبلية في وادي الحيتان.

كمان الفيوم فيها جولات سياحية لهرم هوارة وقصر قارون ومدينة كوتا. أما لو أنت رايح علشان تستريح فيكفي إنك تحجز في فندق وتستمتع بالأكل هناك لأن أكلهم البيتي لا يُعلى عليه، وما تنساش تبقى تاخد معاك كريم أو بخاخة مضادة للناموس لو هتقعد بليل علشان الناموس مش بيهزر هناك.

العين السخنة

ساعة ونص تقريبًا وتبقوا على البحر، وده السبب اللي بيخلي أغلب الناس تقضي العيد هناك، جو جميل وقاعدة هادية والبعد عن زحمة القاهرة مافيش أجمل من كده، ومؤخرا بقى فيه أنشطة كتيير تتعمل في العين السخنة غير أكل السمك والأنتخة زي الكايت سيرفيج وركوب يخت ليوم على البحر ده غير الرحلات في الجبل واكتشاف الحياة البرية والتسلق هناك. برضه مافيش مانع من حبة ركوب عجل أو جري على البحر. لكن الأكيد إنه مكان مناسب للأسرة وفيه أغلب اهتمامتهم. ولو على الأكل فالمطاعم هناك فتحت كتيير جدًا خاصة في بروتو السخنة. 

الإسكندرية

شط إسكندرية يا شط الهوى، مافيش أجمل من إسكندرية في أي وقت أو في أي مناسبة، وصحيح هي هتبقى زحمة شويتين في العيد بس حب وعشق إسكندرية ليهم طعم تاني، وده اللي بيميزها، فسواء رحت تضرب أكلة سمك معتبرة في بحري، أو كبدة من محمد أحمد أو حتى إكتفيت بفطار معتبر من ألبان سويسرا أنت أكيد كسبان. بس ما تنساش تحبس بآيس كريم عزة مع كوباية قهوة بن برازيلي. ولو فضل عندك وقت ممكن تخطف رجلك لمكتبة إسكندرية، أو أوبرا سيد درويش.

رأس سدر

ممكن تكون بعيدة شوية  بس لو رحتم من بدري قوي تقدروا تقضوا اليوم هناك. والمكان مش بس بحر حلو وقرى سياحية كتير، لكن كمان فيه أنشطة علاجية بالطمي أو نزول عيون موسى ده غير طبعًا حمام فرعون. لكن أكتر حاجة هتستمتعوا بيها هي نشاط الكايت سرفيج على البحر، واللي تقدروا تمارسوه بسهولة بعد حبة تدريب.

أجر فيلا على طريق مصر إسكندرية الصحراوي أو المنصورية

العيد بيحب اللمة وده السبب الوحيد اللي يخليك تتفق مع الناس اللي بتحبهم وتأجر فيلا ببيسين ليكم لوحدكم، الموضوع نفس تكلفة الداي يوز تقريبًا بس الفرق أنكم هتبقوا براحتكم من غير قيود ومن غير زحمة، ممكن تعملوا بابركيو وتشووا أكلكم، وبعدها شاي على الفحم يعدل المزاج، أو تبقوا جايبين أكل مناسب على التسخين بس. في الحالتين هتستمتعوا بيوم مميز تفصلوا فيه من الزحمة.