The Definitive Guide to Living in the Capital , Cairo , Egypt

فيه مقولة قديمة بتقول لو يومكم بدأ بسعادة هتفضلوا طول اليوم سعداء، وعلشان اليوم يكون جميل ولطيف أكيد محتاجين نغير الموود في مكان مختلف، وده اللي قدرنا نحس بيه لما زرونا Pottery Cafe المعادي، واللي جربنا الفطار فيه، وخلال السطور الجاية هننقل لكم تجربتنا في المكان والأكل الجميل اللي بيقدمه.

المكان فيه قعدة داخلية، وواحدة خارجية، واحنا اخترنا نقعد جوا، واكتشفنا ديكور كلاسيكي مميز خلانا نحس بالبهجة، وكمان فريق العمل في المكان مبتسم طول الوقت وبيساعد بشكل محترف، وبيلبي طلباتكم بسرعة، ودي حاجة مميزة في ظل زحمة المطاعم والأماكن اللي فيها إفطار الصبح.

وبما أننا كنا موجودين الصبح بدري عندهم فقررنا نطلب من عندهم وجبة إفطار Pottry بـ64 جنيه، وهي كانت عبارة عن فول مصري أصيل، وبيض أومليت مقلي بالطريقة الإسبانية وجبنة بيضاء بالطماطم طعمها جميل جدًا، وباذنجان مقلي، وطعمية للأسف مكنتش أحسن حاجة ومعجبتناش.

وكمان طلبنا سبانش أومليت بالجبنه الموتزرايلا سعره 65 جنيه، وكان طعمه حكاية، وتحسهم عاملينه بمقادير مظبوطة، كل حاجة ليها كمية محددة مhضيعش طعم الحاجة اللي معاه، ولمحبين المشروم هو كان متقدم معاه قطع مشروم محمرة على الجريل طعمها حلو، وبطاطس بالبهارات خلتنا نهيم بيها، وطبق سلطة من أجمل الأطباق اللي أكلناها.

وكمان طلبنا قهوة تركي بـ28 جنيه، ونقدر نقول أن البن كان فعلًا من أجود الأنواع، والتسوية بتاعته كويسة جدًا ماكنش تقيل ولا خفيف، معياره مظبوط وطعمه مظبوط، وكمان طلبنا شاي بـ27 جنيه، وهما من الأماكن القليلة اللي بتستخدم شاي مستورد في المطاعم والكافيهات، ودي كانت حاجة مميزة وانبسطنا منها.

تجربتنا بشكل مجمل كانت مميزة وفرحنا بيها جدًا، وكمان نقدر نقول أنه من أفضل أماكن الإفطار اللي بنرشحها في المعادي، وماتنسوش أن هما عندهم فروع كتير في “الزمالك – الإسكندرية – مدينتي – المعادي الجديدة –مول العرب – 6 أكتوبر”، وأن الأسعار دي غير شاملة الخدمة والضريبة.

وتقدروا تعرفوا أكتر عنهم من خلال صفحة الفيسبوك من هنا.