The Definitive Guide to Living in the Capital , Cairo , Egypt

بشكل عام الأكل الإيطالي مزاج، ومش أي حد يقدر يعمله بطعم إيطالي حقيقي، وطبعًا إحنا كمصريين لما بنقول إيطاليا مش بنفكر غير في الباستا والبيتزا والجزم الجلد، لكن في رحلتنا للبحث عن مطعم إيطالي حقيقي واكتشافه، سمعنا عن Casa La Pasta، فقررنا نشد الرحال ونروح، وننقلكم تجربتنا معاه، وكان أحلى ما في التجربة إن المطبخ مفتوح وشايفينه قدامنا، والريحة بتاعة الأكل طالعة بتقولنا “جهزوا نفسكم.. الأكل جيلكم”.

المطعم مش كبير، ويادوب فيه 4 ترابيزات داخلية و2 خارجية، بس الحلو إنه قادر ينقلكم فعلًا من الشارع المصري الأصيل لديكور إيطالي بأغانيه اللي صوتها هادي، والمنيو اللي معمول باحترافية، والترابيزات على الطراز الإيطالي، وحتى البار كل حاجة عليه كانت إيطالية، وكمان لما بتحتاجوا تطلبوا حاجة، متندهوش على الويتر، لإن هيكون جنبكم “جرس” صغير عليه علم إيطاليا، محطوط لمساعدتكم.

المعاملة مع الاصطاف ممتازة، والاصطاف كله بيبتسم وبيكلمكم بصوت هادي وبإحترام بقى نادر اليومين دول.

أول طلب لينا كان من المقبلات واخترنا “موتزاريلا دي بافلو فرايد” بـ 54 جنيه، ودي عبارة عن جبنه موتزاريلا مقلية، ومعاها صوص أحمر سبايسي، وطعمها كان حكاية، وحقيقي كنا نتمنى إنها تكون أكتر من 4 قطع لأنها كانت حلوة جدًا، وأكلناها واحنا مبسوطين.

الطلب الرئيسي كان بيتزا “كواترو” بـ 90 جنيه، ودي عبارة عن عجينة بيتزا رقيقة جدًا زي الكتالوج الإيطالي ما بيقول، وعليها تشكيلة جبنة “ريكفورد وموتزاريلا وبارميزان وبافلو” ومتزوقين بصوص البيتزا الخاص بيهم والمميز، وكان طعمها جميل جدًا، والجبنة البارميزان كانت مديه طعم خاص ليها، وحاولنا نعرف صوص البيتزا مكون من إيه ولكن للأسف مع الجبنة الكتير مقدرناش نميز مكوناته لكن بشكل عام هي اختيارنا الأول ونصيحتنا لكم.

وطالما إيطاليا يبقى الباستا لازم تحضر، وفي اللحظة دي قررنا نطلب “ريزوتو سي فود” بـ 132 جنيه، والحقيقة ده كان ترشيح من الويتر، واحنا مرفضناش وقلنا نجرب، وكان عبارة عن طاجن متغطي بالعيش المخبوز مخصوص عليه، ولما تقتحوه هتلاقوا “الريزوتو” مطعمة بالجمبري والكالماري، والصوص الأحمر معمول من الطماطم الشيري واللي هتلقوا قطع منها وسط الطاجن، ومرشوش عليها ريحان مديها طعم وريحة مميزين، وكان طعم الجمبري طاغي على الريحة كمان.

بعد ما خلصنا أكل وانبسطنا واحنا بنطلب الشيك، المحل أهدانا كاس آيس كريم هدية، وكان طعمه حلو بس مش إيطالي خالص، ولكن كانت لفتة مميزة منهم، وعرفنا إنهم بيعملوهم مع كل العملاء عندهم، وبشكل عام التجربة كانت ممتازة وانبسطنا منها جدًا.