واحة العزوة.. أكل بلدي مختلف في الريف الأوروبي
أكل بلدي الريف الأوروبي لحم غزلان لحم نعام واحة العزوة
جميل أننا نلقى مكان فيه كل الخدمات اللي ممكن نحبها وتناسب كل الأعمار والأجمل أن المكان يكون أكله بلدي ومميز، واحنا لما شفنا إعلانات عن واحة العزوة في الريف الأوروبي كانت من ضمن خطط فريق كايرو 360 للتجربة علشان نقولكم كل التفاصيل عنها، وعلشان كده قررنا نروح المشوار ده ونجرب حاجات كتير، ورغم أن الخدمات قليلة إلا أننا انبسطنا من الأكل وهنقولكم على كل التفاصيل اللي محتاجين تعرفوها عن الواحة.
واحة العزوة هي مكان مميز وتقدروا تقولوا هو “عزبة” بس على صغير وعندهم قعدات أوت دور وإن دور، والإن دور عبارة عن كباين بتساع على الأقل 15 فرد ومكيفة ودي بيكون سعرها 300 جنيه، والآوت دور عبارة عن ترابيزات وكراسي عادية في أكتر من مكان ولكن بدون أي فيو نهائي.
كمان عندهم وطبقًا لاعلانتهم ركوب خيل بسعر 90 جنيه للربع ساعة، وبالفعل لقينا عندهم “مدمار” خيل بره الواحة وحصانين في مكان داخلها، ولكن الأحصنة كان واضح انها مهلوكة ومريضة، وكمان يوم ما رحنا مكنش متاح أننا نركبها، وكمان كانوا قالوا أن عندهم حيوانات متاح التصوير معاها وده مش موجود للأسف لأن الحيوانات اللي عندهم بيستخدموها في الأكل ودي الميزة اللي هنتكلم عنها في السطور اللي جاية، وبعيدًا عن مشاكل الخدمة عندهم إلا أننا استمتعنا بالأكل بتاعهم.
البداية طلبنا من عندهم سلطات مختلفة “طحينة – خضراء – حمص – باذنجان – بابا غنوج”، وسعر الطبق 20 جنيه، وطعمهم كان حلو، وكمان طلبنا طبق محشي مشكل بسعر 75 جنيه وهو مطهي زي ما قال الكتاب، وعجبنا الممبار اللي كان سعره 90 جنيه، وطلبنا كمان سمان مشوي سعره 75 جنيه، ولكن مكنش فيه تتبيلة تديه طعم مميز وتسويته مكنتش أفضل حاجة.
دخلنا كمان على التقيل وطلبنا طاجن موزة نعام بسعر 230 جنيه وطاجن رقبة نعام بسعر 295 جنيه، وكان طعمهم حلو وانبسطنا منهم، وكمان طلبنا طاجن بطاطس باللحمة بسعر 250 جنيه، وربع كفتة بسعر 390 جنيه، وفعلًا لازم نشهد أن البلدي بلدي واللي طعمه لا يعلى عليه.
أما المشروبات فكانت محدودة بسبب عطل في المكان فطلبنا قهوة ونسكافيه بسعر 30 جنيه للصنف، وشاي بسعر 15 جنيه.
واحة العزوة بيقدموا لحم غزلان وسعر الكيلو عندهم 990 جنيه، ولكن بيبيعوا الغزالة كاملة وبتتسوى حسب طلب العميل وبالحجز، وكمان عندهم حمام وفراخ وبط وغيرهم من الأكلات البلدي من المزرعة لكم مباشرة، ده غير أنهم بيعملوا المندي في أفران تحت الأرض علشان يديكم الطعم الأصلي، ولو معاكم أطفال هينبسطوا من الكيدز ايريا اللي موجودة هناك، وفي المجمل احنا بنشجعكم تروحوا تاكلوا هناك ومتقلقوش من الحر علشان عندهم كباين مكيفة، ويفضل تحجزوا وكمان وانتوا رايحين لازم تتابعوا معاهم بالتليفون علشان يوفروا عليكم 40 كيلو زيادة في الطريق.
العنوان: الريف الأوروبي – طريق مصر إسكندرية الصحراوي.
تقدروا تعرفوا أكتر عنهم من خلال صفحة الفيسبوك من هنا.
