The Definitive Guide to Living in the Capital , Cairo , Egypt

رنا شرف

الصور الرئيسية: Josephine Amalie Paysen

في كايرو 360 بندور طول الوقت على أجمل التفاصيل في القاهرة، التفاصيل البسيطة والمدهشة، اللي تخلينا نحب العاصمة أكثر ونستمتع بكل اللي بتقدمه لنا بكل حب. لما عرفنا إن فيه مطعم إيطالي جديد فتح في المعادي اسمه “مستر موسى” حسينا بسعادة، يمكن لأننا بنحب المنتجات الإيطالية اللي بتشبه جمال القاهرة بتاريخها العريق، ويمكن بسبب إننا عارفين إن الفرع ده هو الأول في مصر بعد فرعهم المهم في ميلانو الإيطالية.

“مستر موسى” مش مجرد مكان بيقدم منتجات إيطالية، ده عالم كامل في القاهرة بينقلك لميلانو ومخبوزاتها اللي ماحدش يقدر يقاوم جمالها ورائحتها المميزة. “مستر موسى” شخصية حقيقية، هو الشيف الرئيسي في المطعم، وهو إيطالي من أصل مصري نجح أنه يكون منافس قوي لأقوى الأماكن في إيطاليا، وبعدها قرر يرجع مصر لحبه فيها علشان يفتح أول فرع له، واختار المعادي الجميلة علشان تكون أول محطة.

خلال السطور الجاية هنحكي لكم قصة نجاح “مستر موسى” وتجربتنا معاه في فرع المعادي.

“مستر موسى” سافر ايطاليا من 35 سنة بعد ما خلص دراسته، وهناك اشتغل في مخبز واتعلم فنون صناعة المخبوزات على إيد واحد من أمهر الخبازين الإيطاليين، وخلال 5 سنين فتح أول مخبز له في مكان صغير وسماه “ميلانو بيكري” واشتهر هناك بتفصيلة مهمة وهي رائحة مخبوزاته اللي ماحدش يقدر يقاومها، وبدأ اسمه يتعرف ووقتها المكان الصغير كبر وأخذ مكان تاني ومعمل ولحد ما بقى عنده 3 فروع في ميلانو وهنا غير الإسم وأصبح المكان اسمه “مستر موسى” وبقى يتوصف من الناس بأنه “Uomo come il pane” بمعنى “رجل مثل الخبز” لأنه شخص بيتعامل مع عملائه على أنهم ضيوف وواجب إكرامهم بكل حب.

“مستر موسى” حصل على مدار 3 سنين متوالية على لقب أفضل بيكري في ميلانو في استفتاء الأهالي هناك، وفي شهر يوليو 2023، كان موعد القاهرة مع فرع مستر موسى الأول على أرضها.

اللي فات ده كان حكاية المكان، واللي جاي هو حكايتنا إحنا مع المكان.

المكان موجود أندر جراوند وفيه إن وأوت دور، وديكوراته بسيطة ومختلفة ومميزة، مع ألوان واضحة ورسومات لأماكن إيطالية مع إضاءات مريحة للعين، وكراسي وترابيزات معمولة على شكل أقفاص العيش.

طلبنا من عندهم ميلك شيك بالتوت وكان سعره 150 جنيه، وكان مظبوط جدًا وطعمه مميز ونكهة التوت كانت واضحة وواضح أنهم بيتسخدموا ماتيريال عالية، كمان طلبنا من عندهم ربع كيلو “فوريلا”، وكانت عبارة عن كوكيز إيطالية بالشيكولاته وسعرها 184 جنيه، وطعمها مميز جدًا وعجبتنا جدًا.

جربنا كمان من عندهم “باتشي ديداما”، وبيطلق عليها “قبلة الأميرة”، وهي عبارة عن كوكيز على شكل العين وفيها شيكولاته، وسعرها كان 247 جنيه لربع كيلو، ورغم جودة المنتج وحلاوته إلا أننا شايفين إن السعر عالي شوية رغم تفهمنا للأوضاع الاقتصادية الحالية.

ده غير البيتزا النابولي اللي جربنا منها السلامي، وكان سعرها 182 جنيه، وكانت فوق الوصف، خفيفة والحشو بتاعها مليان والكواليتي عالي والخامات فعلًا تستاهل كل جنيه اتدفع فيها من حلاوتها وجمالها.

كمان هم بيعملوا مشروباتهم بحبات إسبريسو بتيجي مخصوص من إيطاليا! شربنا من عندهم لاتيه بسعر 95 جنيه، ونوع الإسبريسو المستخدم في صناعته هو “Cosmai”، وهما حاطين شعار الشركة الإيطالية بتاعة القهوة في مكان واضح وبيقولوا أنهم منفردين بنوعية الإسبريسو دي.

عرفنا كمان أنهم بيعملوا بيتزا نابولي وعلى الحطب بشكل بروفيشنال وأكيد هيكون لنا تجربة تاني مخصوص للبيتزا.

خلينا نقول أن الأسعار رغم أنها عالية شوية إلا أن المواد المستخدمة عندهم مستوردة من إيطاليا وفيه حاجات بتتعمل عندهم مافيش حد تاني بيعملها في القاهرة زي كيكة الكريسماس واللي بتتعمل مخصوص مش جاية جاهزة، وكمان عندهم نوع من أنواع العيش اسمه 7 حبات وده مهم جدًا للناس اللي عندها مشاكل في المعدة أو اللي بيعملوا ريجيم، والإسبريسو مستورد من إيطاليا، وحاجات كتير مختلفة هتحبوها.

العنوان: 24 شارع 231 – دجلة المعادي.

تقدروا تعرفوا أكتر عنها من خلال صفحة الفيسبوك من هنا.