The Definitive Guide to Living in the Capital , Cairo , Egypt

رنا شرف

الشاورمة وجنبها شوية طحينة ومخلل! مين يقدر يقاومها! الله علي جمال الشاورمة في عيش كايزر وطحينة أو حتى عيش فرنساوي، والمكس الخطير ده له جمهوره العريض اللي لسه مصمم إن الشاورمة المصري تكسب دائمًا. ولعشاق الأكل المصري بصفة عامة، والشاورما والحواوشي بصفة خاصة، هنعرفكم على تفاصيل تجربتنا في مطعم نص دستة.

مؤخرًا، كنا في زيارة لروكسي، المنطقة الكلاسيكية اللي فيها مصر بتاعة زمان، وطلبت معانا شاورمة مصري، نروح فين؟ لقينا قدامنا مطعم “نص دستة”، فقررنا نخوض التجربة.

دخلنا المطعم وطلبنا شاورمة، عرفنا إنهم عاملين عرض خاص، اسمه تريبل الفرحة، العرض ده مكون من (1 حواوشي لحمة، 1 حواوشي فراخ، 1 شاورما لحمة، 1 شاورما فراخ، 1 حواوشي شاورما لحمة، 1 حواوشي شاورما فراخ، مع 1 بطاطس)، وسعر العرض ده 330، فقررنا ندوس ونطلبه!

أول حاجة جربناها كانت حواوشي اللحمة، كان سخن وطعمه مميز ومخدوم بالبهارات، تاني حاجة جربناها كانت شاورمة اللحمة، الحقيقة نقدر نقول بكل ثقة: الله علي جمالها، فكرتنا بشاورمة زمان خصوصًا مع الطحينة المميزة اللي بيقدمها “نص دستة” والسلاطة الفريش.

جربنا كمان حوواشي الشاورمة، كان مميز جدًا وعجبتنا كل تفاصيله. أما حوواشي الشاورمة ففعلًا حلو ومفتكس ونقدر نقول إنه كمان خفيف.

مشكلتنا مع العرض إن الساندوتشات كلها حجمها صغير جدًا، وهي كايرز، ماعدا الحواوشي في عيش بلدي، ورغم جودتها العالية لكن دي نقطة سلبية، خصوصًا إن السعر مش رخيص.

لكن بصفة عامة، تجربتنا كانت ممتازة ونقدر نقول إننا هنحب نعيدها مرة تانية.