The Definitive Guide to Living in the Capital , Cairo , Egypt

رنا شرف

لو نفسك في فسحة حلوة في جو أسطوري وتاريخي يبقي مافيش أحلي من أهرامات الجيزة، اللي فعلًا هتحس هناك إنك دخلت بوابة بتوصلك لجو تاريخي جميل. ولو أنت من عشاق مصر القديمة وفي نفس الوقت من عشاق الأكل، يبقى أهلًا بيك في مطعم ناين بيراميدز لونج – 9 Pyramids Lounge اللي في قلب أهرامات الجيزة.

فريق كايرو 360 زار المطعم، وفي السطور الجاية هنقول لكم على تفاصيل تجربتنا.

أول ما هتدخل المطعم هتحس بجو مختلف، جو فخم  وأسطوري، وده لأنك هتكون في مكان مفتوح بيطل على فيو عظيم، وهو الأهرامات! منظر يسوى ملايين!

هتلاحظ إن المكان مليان أجانب وعرب ومصريين، وكلهم جايين يستمتعوا بالمنظر الجميل والأكل الحلو.

المطعم فيه مكان داخلي، بس بما إن الجو حلو الفترة دي، يبقي الأوبن إيريا مكان مناسب. المطعم ديكوراته حلوة وجديدة، الترابيزات شيك والكراسي مريحة، وفيه هناك ست جميلة بتخبز عيش مصري أصلي.

عجبنا جدًا إن العيش اللي علي الترابيزات لسه طالع من الفرن حالًا، والست الجميلة دي صممت نأكل عيش طازة من عندها.

نيجي بقى للأكل؛ جربنا من هناك حواوشي سعره 95 جنيه، حلو ومعمول بمزاج عالي. عجبنا كمان الأرز بالخلطة والكفتة وكان معاهم خضار سوتيه، الطبق ده كان أكتر من رائع وطعمه حلو، ملاحظتنا إن الأرز كان كمية المكسرات فيه قليلة وكان هيبقى أجمل لو كانت تزيد، وده سعره 185 جنيه.

جربنا كمان المشاوي، وطلبنا طبق صغير كان عامل 280 جنيه، كان حلو برضه بس كميته قليلة، يعني نقدر نقول إن يكفي فرد فقط.

طلبنا كمان عصير جوافة ب 60 جنيه، كان حلو وطازة.

بشكل عام تجربتنا في المكان كانت إيجابية، الفيو رائع والأكل معمل صح، ودي أكيد تجربة  تستحق نكررها تاني. اعرفوا أكتر عن المكان من صفحتهم الرسمية هنا.