The Definitive Guide to Living in the Capital , Cairo , Egypt

مطاعم كتير حاولت تتوسع وتفتح فروع تانية، بس الموضوع ماكانش بالسهولة اللي كانوا فاكرينها خصوصًا  إن صعب يحافظوا على نفس المستوى. مهراجا ماعندوش المشكلة دي، وأكبر دليل هو السبعة فروع الموجودين في القاهرة ومستواهم الثابت، والنهارده معادنا مع أحدث فروعهم في تيفولي دوم الشيخ زايد.

أول حاجة لاحظناها هي نفس الديكورات الهندي وروائح التوابل والبهارات الهندي المميزة للمطعم، وطبعًا اللون البرتقالي الطاغي على كل حاجة من الكراسي لغاية فوط الأكل.

ابتدينا بطبق كاراك رول Karak Roll (سعره 25 جنيه) عبارة عن كفتة فراخ مقرمشة محشية جبنة شيدر. يمكن الجبنة كانت ناقصها حاجة، بس نكهة الفراخ كانت تحفة ومشطشطة شوية. لازم كمان نقول إن مهراجا بينزل على كل ترابيزة ثلاثة مجات فيهم فواتح شهية.

أول مج كان فيه زبادي بالنعناع طازة ولذيذ. تاني واحد كان مانجو مخللة طعمها حادق جدًا. أخر حاجة كانت هالوبينو مطحون له طعم مسكر ومشطشط روعة.

دخلنا بعدها على العيش: تكا (20 جنيه) ونان بالجبنة (20 جنيه) ونان سادة (10 جنيه). التكا نان كان مقرمش ومحشي قطع فراخ تتبيلتها هايلة أضافت طعم جميل للعيش. نفس الكلام بالنسبة للنان بالجبنة بس بدل الفراخ جبنة. أما النان السادة فهو عيش سادة عادي، بس لما أكلناه مع طبق المقبلات التاني وهو دال مهراجا Dal Maharaja (سعره 50 جنيه) الموضوع اختلف خالص.

طبق الدال مهراجا بيكون عدس أسود بالزبدة مستوي في فرن تندوري. الحلو في الموضوع إن العدس بيكون عايم في صوص لذيذ غني بالزبدة، ويا سلام عليه لما تغمسه في عيش النان.

بعد كده بدأت الأطباق الرئيسية تنزل وأولها رز برياني سادة (25 جنيه) بيتقدم في حاجة تشبه مزهرية خزف وبعدين بيوزعوه في الأطباق. بصراحة الرز مع التوابل الموجودة فيه كان له ريحة تفتح النفس وكنا مستنيين نأكله مع الصوصات ونشوف إيه الكلام.

أما بقية الأطباق وهي تشيكن كورما (55 جنيه) وباتر تشيكن (55 جنيه) وتندوري تشيكن (60 جنيه) وأكباري جوشت Akbari Gosht  (سعره 60 جنيه) بيتقدموا في أطباق معدن صغيرة وكل واحد فيه أربع أو خمس قطع فراخ أو لحمة.

نكمل كلامنا مع فراخ تندوري المكون من قطع فراخ مشوية – مش مخلية – لونهم برتقالي يفتح النفس، وطبعًا نكهة الثوم مع لمسة زنجبيل ذكية. أما الأكباري جوشت فكان أربعة مكعبات ضاني عايمين في صوص روعة، بس للأسف اللحمة كانت مستوية زيادة شوية.

أحلى حاجة من وجهة نظرنا المتواضعة كانت التشيكن كورما والباتر تشيكن، والاتنين عبارة عن خمس قطع صدور فراخ مخلية وطرية ومستوية كويس. الكورما بيتعمل بصوص زبادي وبصل بني وكاري، وتحس فيه فعلًا بالطعم الهندي الأصيل، أما الباتر تشيكن فبيتعمل بصوص طماطم ثقيل فيه توازن بين النكهة المسكرة واللاذعة.

بعد عشر دقايق طلبنا الحلو، وأول حاجة في الحلو كانت جولاب جامون  Gulab Jamun (سعره 20 جنيه) وهو قطعتين من اللبن الرايب المتحمر وعليهم رشة جوز هند وعسل. يمكن الجولاب كان مزيت شويتين بس طعمه تحفة وخصوصًا إنه قريب لطعم الجبنة مع نكهة مسكرة مميزة.

بعدها كان الدور على آيس كريم بجوز الهند (25 جنيه) وجاجاركا حلوة Gajarka Halwa  (سعرها 20 جنيه)، وده عشان اللي مايعرفوش عبارة عن جزر مسكر عليه مكسرات وزبيب وجوز هند وكريز. بالنسبة للآيس كريم فهو بيتقدم في ثمرة جوز هند بجد مفتوحة من فوق. نصحونا نجرب الجزر مع الآيس كريم، والموضوع طلع حلو فعلًا. الجزر السخن لما يتفاعل مع الآيس كريم المثلج بيعمل طعم روعة، ودي كانت أحلى نهاية لأكلة هندي قوية.

أكيد المطاعم الهندي موجودة ومنتشرة في القاهرة، لكن مهراجا قدر يثبت نفسه على الساحة من يوم افتتاحه، والكلام ده بنقوله بناءً على زيارتنا. طيب إيه سر محافظة المطعم على نفس المستوى العالي طول الوقت ده؟ طبعًا اللأكل عنصر أساسي، والأهم كمان إن كل الفروع في القاهرة لها نفس المستوى. جايز مفيش حاجة خارقة للطبيعة في المنيو، بس مهراجا بيعمل كل حاجة في المينو صح الصح.