The Definitive Guide to Living in the Capital , Cairo , Egypt

إتعودنا أن القاهرة فيها أماكن كتيرة
ومتنوعة للوجبات الخفيفة، وده بقى مكان جديد نضيفه لقائمة المفضلين.

 فرع المهندسين من المطعم اللبناني الأصل «منقوشة»
بـ يعمل مناقيش وهمية وسريعة في مكان جلوس ظريف ومريح جداً، مناسب جداً لأكلة على
الماشى أو أكلة خفيفة وأنت سهران بالليل، ومناسب  برضه عشان يديلك طاقة وسط زحمة المواعيد والإمتحانات.

منقوشة الـ “روستو بالجبنه”
(20 جنيه) بـ تشبَّع قوي. و موصوفة في المنيو زي ما بـ يعملوها بالضبط (روست بيف +
جبنة + خيار مخلل + مسطردة + مايونيز + طماطم)، بس الساندوتش أكثر من مجرد
الكوكتيل ده مع بعض، شرائح الروست بيف السميكة وحواليها الجبنة الحلوم السايحة، مع
الطماطم والخيار المخلل والمسطردة، من كتر لذاذتها وطعامتها ممكن توديك في دنيا
تانية خالص وانت قاعد في مكانك. المايونيز، المسطردة والجبنة مع بعض بـ يخلوك تنسى
نفسك تماماً، بس مش مشكلة سيبك من أي حد طول ما انت مبسوط وركز في اللي انت فيه!

عجبتنا قوي الخلطة بتاعة الجبنة الحلوم
مع الطماطم في منقوشة مخبوزة في الفرن (12.75 جنيه)، هي ماكانتش موجودة في المنيو،
بس هناك هما ممكن يعملوا لك أي خلطة تعجبك انت تقترحها. الإختراع كان طعمه حلو
قوي، وشرائح الطماطم إدت طعم فريش كسر مزازة الجبنة وسط العيش الطري.

فيه كمان حاجة هناك، أساسها عبارة عن زعتر
وجبنة حلوم، وبعدين بقى أي حاجة تانية انت عايزها معاها من أول الهوت دوج، الفراخ،
الروست بيف، وحاجات تانية كتير.

الديكور من جوة مبهج وراقي قوي بالنسبة
لمطعم أكل سريع. والمكان بـ يبقى زحمة والناس بـ تتهافت عليه. غير الصور اللي على
الحيطة وعليها كارتون واسم وشعارات المطعم بالعربى والإنجليزي.

الويترز بـ ياخدوا الطلب بتاعك على الكاشير، أو بـ
ييجوا لغاية عندك لو انت شاورت لهم. الخدمة هناك حلوة، سهلة ولطيفة، حتى مع الزباين
اللي بـ يبقى صعب إرضائهم. جربوا كمان شاورمة اللحمة أو الفراخ (أي واحد بـ 19
جنيه). أو جربوا الفاهيتا أو الـ «فيلادلفيا – Philadelphia»، ودي عبارة عن شرائح
ستيك متقطعة + جبنة + مايونيز (أي واحد بـ 19.75 جنيه). اللي بـ يحبوا بقى
الحلويات لازم يجربوا منقوشة الشيكولاتة والموز المخبوزة في الفرن، طعمها حلو قوي
و بـ تبقى مليانة شيكولاتة.