The Definitive Guide to Living in the Capital , Cairo , Egypt

الأكل اللبنانى له سمة مميزة، مناقيش ولبنة وفتوش وتبولة.. وحاجات كثيرة كده من اللى قلبك يحبها، بس فكرة أن حد يتخصص فى نوع معين من الأكل اللبنانى دى مش موجودة كثير، من الناس دي مطعم "منقوشة – Man’oucheh"، كان زمايلنا فى كايرو 360 كتبوا زمان مقال نقدي عن فرع المهندسين، ولأننا شخصيًا ما جربناهوش ولأننا من محبي الشيخ زايد فلقيناها فرصة حلوة أننا نجرب مناقيش "منقوشة" فى الفرع الجديد هناك.

المكان فى الجزء الخارجى من أمريكانا بلازا، جنب مطعم "عجينة" اللى كتبنا عنه قبل كده، القعدة أكبر شوية ومنوعة بين كنب وكراسي منخفضة وبين ترابيزات وكراسي عادية، المكان كان فاضي خالص وبعد شوية بدأ الناس تيجي تونسنا، جاء لنا الجرسون معاه المنيو اللى لقيناها بسيطة خالص، مقسمة لأنواع: زعتر، وشاورما، ودجاج، وجبنة، ولحمة، وحلوم بيف بيكون، وسي فوود، وXXL (منقوشة بس حجم أكبر)، إلى جانب قسم اسمه "أومليت" خاص بالإفطار، وواحد ثاني اسمه "زيادات" للأطباق الجانبية، وبيتزا، ومنقوشة ميني للأطفال، وأخيرًا التحلية والمشروبات.

فى المقال اللى فات جربنا حاجات كثيرة بالجبن، فقلنا المرة دي ندوس فى اللحوم نجربها نشوف إيه النظام، طلبنا شاورمة لحم (34 جنيه) مع كفتة سبيشيال من منيو الـ XXL (46.50 جنيه سعر كومبو مع بطاطس ومشروب)، ومن الطلبات الجانبية أخذنا صحن خضرة (6.50 جنيه) وده عبارة عن طبق صغير فيه شرائح طماطم وخيار مع زيتون أخضر.

الجرسون اللى كان معانا شكله كان لسه شغال جديد، لأنه وصف لنا الطبق أنه بـ يكون عبارة عن منقوشة مدورة وعليها المكونات، لكن لما جاءت لنا كانت عبارة عن حاجة زي رول أو ساندويتشات العيش الصاج، كمان قال لنا الطلب هـ يأخذ 10 دقائق لكن أخذ وقت أكثر من كده شويتين ثلاثة.

منقوشة الشاورما اللحم ما حسيناش خالص أنها منقوشة، حسينا أنها عجينة عيش صاج، وداخلها مكتوب فى المنيو لحم وكبيس خيار وطحينة وطماطم وبصل وبقدونس، الحقيقة إحنا كنا حاسين بطعم العيش أكثر من المكونات، وكمان بـ نأكل بصل مع شاورما مش العكس، البصل كان طعمه طاغى على المنقوشة –أو العيش- وما استمتعناش الصراحة به، على عكس الكفتة السبيشال اللى مكونة من كفتة وجبنة وطماطم ومايونيز وشطة، كمية الكفتة بالنسبة للعيش كانت متقاسة بالمسطرة وطعم الصنعة فى الكفتة بالمكونات كانت ممتازة، ولأن الحجم هنا أكبر جاء لنا 2 رول مش واحد بس زي الشاورما، البطاطس عادية (بطاطس Farm Frites) وبرضه السلاطة الخضراء مافيهاش أى طعم مميز ولا حتى توابل أو صوص.

نيجي بقى للتحلية، إما مهلبية أو منقوشة شوكولاتة نوتيلا وموز (22 جنيه)، على حسب وصف الجرسون أن العجينة بـ تطلع مدورة من الفرن سخنة وبـ يتحط عليها النوتيلا والموز، لكن جاءت لنا بالعكس باردة جدًا و"رول" برضه، ومافيش لها طعم مميز، بصراحة ممكن نعمل أحسن منها فى البيت.

منقوشة بـ يضيفوا 12 % خدمة، تجربتنا الصراحة ما كانتش قوية، وللأسف مش عارفين هل هـ يقدر المكان ينافس المطاعم المحيطة به خاصة أن جاره مطعم "عجينة" وفيه كمان مطعم "فطيرة" قريب من