-
56 شارع منصور
-
مأكولات سريعة
-
Waleed Abuarab
المحل ده موجود في مكان نقدر نقول عليه أثري دلوقتي، في منطقة باب اللوق
وبالتحديد في شارع منصور اللي فيه وزارة الداخلية، وقبل الجدار العازل اللي كان بـ
يفصل بين الوزارة والمتظاهرين بكام متر.
مش هـ تلاقي أحسن من مكرونة مشطشطة وكبدة
وسجق بأسعار رخيصة علشان تعطيك طاقة. المحل صغير وشبه محلات الكشري، مالوش علاقة بالشياكة أو النظافة من حيث
الشكل، لكن عرفنا من مصادرنا أن الأكل عنده مضمون إلى حد ما والدليل أن ما حدش
نعرفه أكل من هناك وراح المستشفى بعدها لا قدر الله. فيه ترابيزات على الرصيف اللي
حول المحل، وفيه قعدة داخل المحل نقدر نقول عليها عائلية شوية. المنيو مكتوب
عليه عبارات حماسية زي “الشطة نار.. بجد مش هزار” و”أصل المكرونة في
مصر” وما ننكرش أن الكلام ده أثر فينا وخلانا عاوزين نجرب «مكرونة رضا» رغم
أننا مش من هواة الشطة قوي بس حبينا الدعاية النارية بتاعته.
الأكلة الأهم في المحل هي المكرونة “البِنا” أو الريَش بالصلصة
الحمراء الحارة اللي بـ تضاف حسب رغبتك، والإضافات اللي ممكن تختار منها هي الكبدة
الإسكندراني والسجق والكبدة البانيه والكفتة بالصلصة والكلاوي. الأسعار بـ تبدأ من
5 جنيه للطبق حسب نوع الإضافة وبـ يوصل لـ 20 جنيه الطبق لو طلبته (ميكس) فيه كل
الأصناف ومعاه سلاطة طماطم ومخلل. جربنا الميكس ده علشان نتذوق كل أنواع اللحوم
عنده ونعرف إيه الأحسن علشان نبقى نجيبه بعد كده. والأحسن كان الكبدة البانيه
الرقيقة جدًا والمقرمشة جدًا، وعلشان كده زودنا رغيف كبدة (7 جنيه) في عيش بلدي
وكان طعمه خطير، وما تقلقش من موضوع الشطة لأنه بـ يبقى حاطط قرن فلفل حار كبير
ممكن تشيله بسهولة من الرغيف لو مش بـ تحب الأكل الحراق.
المحل بـ يعمل كشري عادي بـ 3 جنيه، والمخصوص بـ يبدأ من 7 جنيه، وده اللي
ممكن تضيف عليه أي نوع من اللحوم اللي ذكرناها، وممكن تزود تقلية أو عدس أو عيش
محمص بجنيه واحد. وفيه حواوشي باللحمة وبالسجق (10 جنيه). والحاجة الوحيدة اللي
نشاز عن نوعية الأكلات اللي بـ يقدمها المحل كانت الفاهيتا، اللي ما فكرناش نجربها
أصلًا.
الخدمة هناك غريبة شوية، لأن الشخص اللي قاعد على الكاشير كان تائه شوية
وكل ما نسأله على حاجة في المنيو يسأل العمال اللي داخل المحل. بـ تأخذ أكلك وتروح
تقعد على أي ترابيزة وتأخذ السلاطة والمخللات من على ترابيزة كده أمام المحل. ولو
احتجت تزود طلب هـ تقوم تجيبه بنفسك. وبصعوبة هـ تغسل إيدك بعد ما تخلص أكل، ده لو
لقيت صابون.
«مكرونة رضا» حلاوته في صنعته وأسعاره ووجباته المشبعة، لكن مش بـ نرشحه
لأي حد موسوس بخصوص صحته أو رشاقته.
